პროკურორი: მსჯავრდებულ ია დარახველიძის ადგილსამყოფელის შესახებ ინფორმაცია ამ ეტაპზე არ გამაჩნია, განხორციელდება კანონით დადგენილი პროცედურები

სასამართლომ სრულად გაიზიარა ბრალდების მხარის მტკიცებულებები, მათ შორის, ის ვიდეოჩანაწერები, სადაც ჩანდა მათ მიერ განხორციელებული დანაშაულებრივი ქმედებები და სრულად ცნო დამნაშავედ წარდგენილ ბრალდებებში, - განაცხადა 4 ოქტომბრის საქმის პროკურორმა, ვაჟა თოდუამ.

„მათგან ერთ-ერთმა პირმა განცხადებით მიმართა პროკურატურას შეთანხმების დადების მოთხოვნით, თუმცა დღევანდელ სხდომაზე განაცხადა, რომ სურდა, მის მიმართ საქმე დასრულებულიყო არსებითი განხილვის შედეგად. აქვე აღვნიშნავ, რომ ამ საქმეზე თავდაპირველად ბრალდებულად ცნობილი იყო 15 პირი. მათგან 8 პირმა მიმართა განცხადებით პროკურატურას, აღიარეს დანაშაული, უდავოდ ცნეს ბრალდების მხარის მტკიცებულებები და მოითხოვეს შეთანხმების გაფორმება. მათი განცხადებები დაკმაყოფილდა და სასჯელის სახედ და ზომად 3 წლით თავისუფლების აღკვეთა განესაზღვრათ, რაც ჩაეთვალათ პირობით მსჯავრად“, - აღნიშნა მან.

პროკურორის თქმით, მსჯავრდებულ ია დარახველიძის ადგილსამყოფელთან დაკავშირებით მას ინფორმაცია არ აქვს.

„რაც შეეხება ია დარახველიძის ადგილსამყოფელს, აღნიშნული ინფორმაცია ამ ეტაპზე მე არ გამაჩნია თუ სად იმყოფება, თუმცა მის მიმართ განხორციელდება კანონით დადგენილი პროცედურები და განაჩენი აღსრულდება მისი ადგილსამყოფლის დადგენის და დაკავების შემდეგ. ვალდებული იყო გამოცხადებულიყო სასამართლო სხდომებზე, თუმცა, დღევანდელ სხდომაზე არ გამოცხადდა“, - აღნიშნა პროკურორმა.

4 ოქტომბრის საქმეზე ბრალდებულებს გიორგი ჩახუნაშვილს, კონსტანტინე კოკაიას, დავით სტურუას, კახაბერ მჟავანაძეს, დავით ჟღენტსა და ზაქრო ალბუთაშვილს 5-5-წლიანი პატიმრობა მიესაჯათ, ხოლო ია დარახველიძეს - 3 წელი.