ადვოკატი: მაჩალიკაშვილის საქმის იარაღი შეაკეთეს და ექსპერტიზაზე ისე გააგზავნეს

მაჩალიკაშვილების ოჯახის ადვოკატის ინფორმაციით, იარაღი, რომლითაც სპეცრაზმელმა თემირლან მაჩალიკაშვილი დაჭრა, ექსპერტიზაზე შეკეთების შემდეგ გადააგზავნეს. ინფორმაციას სააგენტო "ინტერპრესნიუსი" ავრცელებს.

მარიამ კუბლაშვილის თქმით, ექსპერტიზის დასკვნით დგინდება, რომ 26 დეკემბერს ჩატარებული სპეცოპერაციის შემდეგ იარაღი შეაკეთეს და ექსპერტიზაზე ისე გადააგზავნეს. 

კუბლაშვილის თქმით, ამით შესაძლოა, განადგურდა ისეთი მტკიცებულება, რაც დაცვის მხარისთვის უმნიშვნელოვანესი ყოფილიყო. ამასთან, კუბლაშვილის თქმით, ცეცხლსასროლ იარაღზე ბალისტიკური ექსპერტიზის ჩატარება იმის გამო მოითხოვეს, რომ შემთხვევის ადგილიდან გამოძიებამ ვაზნა არ ამოიღო. 

"ჩვენ რომ ვიკითხეთ, რატომ არ ამოიღეს ვაზნა, გვითხრეს - იარაღმა გაჭედა გასროლისას და ამიტომ ვერ ამოიღეს. ვაზნა ჩარჩენილი იყო იარაღში. ამიტომ მოვითხოვეთ ექსპერტიზის ჩატარება. ამ ექსპერტიზის ჩატარების შემდეგ, ექსპერტი წერს ასეთ რაღაცას: იარაღი, რომელიც მას გადაეცა, გამოსაყენებლად ვარგის მდგომარეობაში იყო. ასევე ექსპერტიზისას გამოვლინდა, რომ ეს იარაღი 26 დეკემბრის შემდეგ შეაკეთეს და ისე გაუგზავნეს ექსპერტიზას შესამოწმებლად. ვის აქვს ნივთმტკიცების განადგურების და გადაკეთების უფლება? ეს უპრეცედენტო შემთხვევა და შეცდომაა. როდესაც ადამიანი ამბობს, რომ იარაღმა გაჭედა, ეს იარაღი უნდა დაილუქოს და უნდა მოხდეს მასზე კვლევა. დღეს კი მე მეუბნენიან, რომ ამ ინციდენტის შემდეგ, ხელმძღვანელებს აცნობეს და იარაღი შეაკეთეს. რისთვის გადაუგზავნეს მაშინ ექსპერტიზას? რა არის ეს, თამაშია?“, - განაცხადა მარიამ კუბლაშვილმა. 

ადვოკატი გამოძიების წინაშე ახალ შუამდგომლობას აყენებს და იარაღზე ახალი ექსპერტიზის ჩატარების გარდა, მის მიერ მოწვეული ბალისტიკური ექსპერტის მონაწილეობით იარაღის იმ ნაწილის გამოკვლევასაც ითხოვს, რომელიც სპეცრაზმელის ავტომატს შეუცვალეს. 

თემირლან მაჩალიკაშვილი 11 იანვარს საავადმყოფოში გარდაიცვალა. ის პანკისში სპეცოპერაციის დროს დაიჭრა.

მაჩალიკაშვილის მშობლები და პანკისის უხუცესები აჰმედ ჩატაევთან და ტერორისტებთან მაჩალიკაშვილს კავშირს გამორიცხავენ.

სუსის ცნობით, პანკისის ხეობასა და თბილისში ჩატარებული სპეცოპერაციის დროს დაკავებული ხუთი მოქალაქე დაეხმარა აჰმედ ჩატაევს საქართველოს საზღვარზე გადმოსვლაში.

სუსის ინფორმაციით, დაკავებული პირები 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე.