პროკურატურა ქონების უკანონოდ ჩამორთმევის ფაქტებზე ინფორმაციას ავრცელებს

მთავარი პროკურატურის დეპარტამენტმა ქონების უკანონოდ ჩამორთმევის ფაქტი გახსნა. დადგინდა, რომ 2010 წლის 24 ნოემბერს შსს-ს თბილისის მთავარი სამმართველოს თანამშრომლების მიერ ნარკოტიკული საშუალების უკანონოდ შეძენა, შენახვის ფაქტზე დააკავეს მოქალაქე ლევან ჯამაგიძე, რომელსაც აღკვეთის ღონისძიების სახით შეეფარდა პატიმრობა. ინფორმაციას მთავარი პროკურატურა ავრცელებს.
 
პატიმრობაში ყოფნის პერიოდში, საქართველოს შინაგან საქმეთა სამინისტროს ცალკეულმა თანამდებობის პირებმა, ლევან ჯამაგიძის ოჯახის წევრებს, ბრალდებულთან საპროცესო შეთანხმების გაფორმების სანაცვლოდ, უკანონოდ მოსთხოვეს და შეასყიდინეს მთლიანობაში 95 568 ლარის ღირებულების ორი ერთეული „ჰიუნდაი IX 35“ მარკის ავტომანქანა, რომლებიც ჯამაგიძის ოჯახმა ჩუქების გზით სახელმწიფოს გადასცა. მხოლოდ ამის შემდეგ ლევან ჯამაგიძესთან გაფორმდა საპროცესო შეთანხმება პირობით სასჯელზე.

პროკურატურა მიმართავს სახელმწიფო ქონების მართვის ეროვნულ სააგენტოს, რომ დაზარალებულ ლევან ჯამაგიძეს დაუბრუნდეს ამჟამად სახელმწიფო ბალანსზე დარიცხული ორი ავტომანქანა.

რაც შეეხება ქონების უკანონოდ ჩამორთმევაში მხილებულ ყოფილ საჯარო მოხელეებს, გამოძიებასთან თანამშრომლობის ხარისხის გათვალისწინებით, პროკურატურა გამოძიების დასრულების შემდეგ იმსჯელებს მათ მიმართ დისკრეციული უფლებამოსილების გამოყენების მიზანშეწონილობის საკითხზე. 

გარდა ამისა, ახალმა დეპარტამენტმა უკანონოდ გამოტანილი გამამტყუნებელი განაჩენის გადასინჯვის გადაწყვეტილებაც მიიღო. 2011 წლის 17 თებერვლის განაჩენით მოქალაქე გიორგი ონიანი ცნობილ იქნა დამნაშავედ მიწის ნაკვეთის თაღლითურად ხელში ჩაგდების ფაქტზე, რომლის თანახმად, 2005 წელს, გამგეობაში წარდგენილი ყალბი დოკუმენტების და ფიქტიური ხელშეკრულების საფუძველზე, გიორგი ონიანმა საკუთრებაში დაირეგისტრირა გარდაბნის რაიონის სოფელ კრწანისში მდებარე 228,38 ჰა ფართობის მიწის ნაკვეთი.

პროკურატურა მიმართავს თბილისის სააპელაციო სასამართლოს ახლად გამოვლენილ გარემოებათა გამო გიორგი ონიანის მიმართ გაუქმდეს გამამტყუნებელი განაჩენი. სასამართლოს მიერ პროკურატურის მოთხოვნის დაკმაყოფილების შემთხვევაში დაზარალებული დაიბრუნებს უკანონოდ ჩამორთმეულ მიწის ნაკვეთს.

გამამტყუნებელი განაჩენის გადასინჯვის მოთხოვნით სასამართლოში 53 მსჯავრდებულის მიმართ გაიგზავნა შუამდგომლობა, საიდანაც 16 პირის მიმართ უკვე დადგა გამამართლებელი განაჩენი; დაზარალებულად ცნობილ 149 მოქალაქეს დაუბრუნდა 44 მილიონამდე ლარის ღირებულების უძრავ-მოძრავი ქონება, მათ შორის ა/მანქანები, საცხოვრებელი ბინები, საოფისე და კომერციული ფართები, ღვინის ქარხანა, საცურაო კომპლექსი, სასტუმრო კომპლექსი, მიწის ნაკვეთები და ა.შ.", - განაცხადეს მთავარ პროკურატურაში.