ადვოკატი: თემქაზე მომხდარი მკვლელობის არცერთ ნივთმტკიცებას ექსპერტიზა არ ჩატარებია

არის გარკვეული სიახლეები და მტკიცებულებები, რაც ლადოს პოზიციებს საკმაოდ ამყარებს, - ამის შესახებ თემქაზე ახალგაზრდა გოგოს მკვლელობაში ბრალდებული ლადო გრიგალაშვილის ადვოკატმა, ნაირა ოტიაშვილმა განაცხადა. ინფორმაციას “ინტერპრესნიუსი“ ავრცელებს.

ნაირა ოტიაშვილის ინფორმაციით, ჯერჯერობით არც ერთ ნივთმტკიცებას, რომელიც გამოძიებამ საქმის ძიებისას ამოიღო, ექსპერტიზა არ ჩატარებია, მათ შორის არც დანას.

"ჯერჯერობით არც ერთ ნივთმტკიცებას, მათ შორის დანას, ექსპერტიზა არ ჩატარებია. ჩემთვის არც სატელეფონო ამონაწერები გადმოუციათ და შესაბამისად, არ ვიცი, ამ მხრივ იმუშავა თუ არა გამოძიებამ", - განაცხადა ოტიაშვილმა.

22 თებერვალს, გამთენიისას, თემქაზე გოგო კორპუსის უკან პატარა სკვერში ყელგამოჭრილი იპოვეს.  21 წლის ანა ნაცვლიშვილის მკვლელობის ბრალდებით მისი ყოფილი შეყვარებული ლადო გრიგალაშვილი იმავე დღეს დააკავეს.

საქმის პროკურორის, გრიგოლ ბიბილაშვილის ინფორმაციით, გარდაცვლილს თავისა და კისრის არეში დანით 7 ჭრილობა აქვს მიყენებული.