კორცხელის საქმეზე მოწმემ განსხვავებული ჩვენება მისცა

კორცხერლის საქმეთან დაკავშირებით ზუგდიდის რაიონულმა სასამართლომ კიდევ 10 მოწმეს, მათ შორის 2016 წლის 22 მაისის შუალედურ არჩევნებზე მაჟორიტარი დეპუტატობის კანდიდატის შვილს, დიმა ლაშხიას მოუსმინა. მან სასამართლოს განსხვავებული ჩვენება მისცა. ინფორმაციას “ინტერპრესნიუსი ავრცელებს.

“არ ვიცი ვინ წამოიწყო ჩხუბი, რადგან როცა მოვედი, შეხლაშემოხლა უკვე დაწყებული იყო. არ ვიცი ვინ ჩხუბობდა და ვის ეჩხუბებოდა. მე ვნახე ჩემი ბიძაშვილი, რომელიც ნაცემი იყო და მის წამოსაყვანად მივედი, რა დროსაც ვიღაცამ დამარტყა“, - აღნიშნა ლაშხიამ.

მოწმეს პროკურორმა გამოძიებისთვის 2 წლის წინ მიცემული ჩვენება გამოუქვეყნა: „როდესაც მოვედი, ჩხუბი დაწყებული იყო. დავინახე, როგორ ექაჩებოდა ჩემთვის უცნობი ათი პირი ნიკანორ მელიას. დავინახე, რომ ძირს ეგდო ნაცემი გიგა ბოკერია. ვანახე აგრეთვე ჩემი ბიძაშვილი, რომელიც ნაცემი იყო. როდესაც მის დასახმარებლად წავედი, მეც დამარტყეს, ვიგრძენი ძლიერი ტკივილი, მერე საავადმყოფოშიც წამიყვანეს“, - ნათქვამის ლაშხიას პირველ ჩვენებაში.

ჩვენების გასაჯაროების შემდეგ მას ბრალდებულების ადვოკატმა ზურა ბელთაძემ ჰკითხა, თუ რატომ იყო მისი ჩვენებები განსხვავებული, რაზეც მოწმემ უპასუხა, რომ მას შემდეგ დიდი დრო გავიდა და ფაქტები კარგად არ ახსოვს.

აღნიშნულ საქმეზე შემდეგი პროცესები 18, 19 და 20 აპრილს გაიმართება. ზუგდიდის სასამართლო კიდევ სამ მოწმეს მოუსმენს, მათ შორის ენმ-ს ლიდერ ნიკანორ მელიას.

კორცხელის ინციდენტი შუალედური არჩევნებისას, 2016 წლის 22 მაისს, კორცხელის 53-ე საარჩევნო უბანთან მოხდა. ერთმანეთს სპორტსმენები და „ერთიანი ნაციონალური მოძრაობის“ ლიდერები დაუპირისპირდნენ. შედეგად, ექვსი ადამიანი სხვადასხვა სახის დაზიანებით ზუგდიდის რეფერალურ საავადმყოფოშიც იყო მოთავსებული, მათ შორის - ორი პოლიციელი. ინციდენტისას ფიზიკური და სიტყვიერი შეურაცხყოფა მიაყენეს ჟურნალისტებსაც.

ამ საქმეში 6 ადამიანია ბრალდებული, რომელთაც სასამართლომ აღმკვეთი ღონისძიების სახით, გირაო შეუფარდა.

კორცხელის ინციდენტში ბრალდებულები და მათი ადვოკატი ზურაბ ბელთაძე ზუგდიდის რაიონულმა სასამართლომ დააჯარიმა, თითეულს 300 ლარის გადახდა დაეკისრა.