ირაკლი ქორიძის ადვოკატმა მოსამართლის აცილება მოითხოვა

ორგანიზებული ჯგუფის მიერ დიდი ოდენობით ნარკოტიკების საქართველოში შემოტანისა და შენახვის ბრალდებით დაკავებული ირაკლი ქორიძის დაცვის მხარემ მოსამართლე ნატო ხუჯაძის აცილების საკითხი დააყენა. ინფორმაციას სააგენტო "ინტერპრესნიუსი" ავრცელებს.

პროცესის დაწყებისას ბრალდებულის ადვოკატმა დავით კორკოტაშვილმა მოითხოვა განმარტება, როდის შევიდა სასამართლოში აღნიშნული სისხლის სამართლის საქმე და რამდენ ფურცლად, რაზეც მოსამართლემ უპასუხა, რომ სასამართლოში საქმე შევიდა დღეს, 1-ელ აპრილს, 10:37 საათზე და 1400 ფურცელია.

ამის შემდეგ ადვოკატმა განაცხადა, რომ მოსამართლემ უნდა აიცილოს საქმის განხილვა, რადგან ის ვერ იქნება ობიექტური და მიუკერძოებელი, ერთი მარტივი გარემოების გამო, რომ ის აღნიშნულ პერიოდში 1400-გვერდიან საქმეს ვერ შეისწავლიდა. მოსამართლე ნატო ხუჯაძემ კი აღნიშნა, რომ მას ქორიძის საქმე შესწავლილი აქვს და კარგად იცნობს. მოსამართლემ დაცვის მხარის მოთხოვნა არ დააკმაყოფილა.

30 მარტს შსს-ს მიერ გავრცელებული ინფორმაციით, დააკავეს დანაშაულებრივი ჯგუფის ორგანიზატორი, ირაკლი ქორიძე, რომელმაც თანამზრახველებთან ერთად დაგეგმა და ქვეყანაში უკანონოდ შემოიტანა განსაკუთრებით დიდი ოდენობით ნარკოტიკული საშუალება. 

შინაგან საქმეთა სამინისტროს მიერ გავრცელებული ინფორმაციით, დანაშაულებრივ ჯგუფში ფიგურირებს მსახიობი გიორგი გიორგანაშვილი.

გუშინ დეპუტატმა, დავით მათიკაშვილმა ქორიძის შესახებ "ქრონიკაში" ისაუბრა და თქვა, რომ ქორიძე 2011 წელსაც იყო დაკავებული, თუმცა 2014 წელს ის პრეზიდენტმა გიორგი მარგველაშვილმა შეიწყალა.

"ეს არის პიროვნება, რომელიც 2011 წელს იყო გასამართლებული 300 აბი სუბოტექსის შენახვა-შემოტანაზე. მას 30 წლით თავისუფლების აღკვეთა მიესაჯა. 2013 წელს მას შეეხო ამნისტიის აქტი. ამ დროს მას სასჯელის ვადის 1/4 მოაკლდა. 2014 წელს ის არა ამნისტიის, არამედ უკვე შეწყალების აქტით, პრეზიდენტმა, გიორგი მარგველაშვილმა გაათავისუფლა" -თქვა მათიკაშვილმა. 

მისივე თქმით, პრეზიდენტის მხრიდან შესაძლოა ადგილი ჰქონდა ნეპოტიზმს, რადგან სოცქსელებში გავრცელდა ინფორმაცია, რომ ქორიძის ყოფილი მეუღლე ნატალია ჩიჩუა, პრეზიდენტის მაკა ჩიჩუას ნათესავია და ეს იყო  ქორიძის შეწყალების მიზეზი.