თვითმხილველი: დავინახე როგორ უყურებდა უცხო პირი ხორავას ქუჩაზე გარჩევას

თბილისის საქალაქო სასამართლოში ხორავას ქუჩაზე მოკლული მოზარდების საქმის განხილვა განახლდა. დღევანდელ პროცესზე ბრალდების მტკიცებულებებს იკვლევენ. საქმის პროკურორის განცხადებით, დღეს ერთი არასრულწლოვანი მოწმეც დაიკითხება, რომელიც კონფლიქტის უშუალო მონაწილე იყო.

სასამართლოში დღევანდელ პროცესზე თვითმხილველებიც დაიკითხებიან. ბრალდების მხარის მოწმე, ერთ-ერთი თვითმხილველი ამბობს, რომ უცხო პირი დაინახა, რომელიც მანქანასთან იდგა და მოზარდების სისხლიან გარჩევას უყურებდა.

"თავიდან ბოლომდე უყურა ამ პროცესს და როდესაც დასრულდა, ავტომობილში ჩაჯდა და წავიდა", - თქვა მოწმემ.

მოწმეებს შორის ასევე არის ჟურნალისტი თამარ გოცირიძეც. მან სხდომის დაწყებამდე მომხდარის შესახებ კომენტარი გააკეთა, რომელსაც 1tv ავრცელებს.

„ორ მოზარდს შორის მოხდა ჩხუბი, თითქოს, ერთმანეთს მუშტებს ურტყამდნენ. დავიყვირე, დარეკვა დავაპირე. დავინახე, რომ ერთი მოზარდი ჩაიკეცა და მაშინ მივხვდი, რაღაც ცუდად იყო. მეხუთე სართულიდან დეტალურად რამეს დანახვა რთულია. კონფლიქტი ვისთან ჰქონდა, ვერ დავინახე, ვნახე როგორ იდგა და როგორ ჩაიკეცა. ვხედავდი მხოლოდ ქურთუკებში ჩაცმულ სილუეტებს“, – განაცხადა თამარ გოცირიძემ.

სასამართლო სხდომის პარალელურად, საქალაქო სასამართლოსთან მშვიდობიანი აქცია „ნუ მომკლავ - აღასრულე სამართალი“ - სასამართლოსთან აქცია მიმდინარეობს.

გასული წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე მოზარდი მრავლობითი დაზიანებებითსაავადმყოფოში მოთავსებიდან, მეორე დღეს, 2 დეკემბერს გარდაიცვალა. 

შინაგან საქმეთა სამინისტროს ინფორმაციით, ხორავას ქუჩის ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. 

მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ აღკვეთის ღონისძიების სახით პატიმრობა შეუფარდა.