პროკურორი: ბრალდებულს არ უთქვამს, რომ მირზა სუბელიანმა მკვლელობის შესახებ იცოდა

ხორავას ქუჩაზე მომხდარი მკვლელობის საქმეზე დღეს ერთ-ერთი ბრალდებული დაიკითხა, რომელმაც განაცხადა, რომ პროკურორმა მირზა სუბელიანმა მკვლელობის შესახებ იცოდა. ეს ინფორმაცია სხდომის დასრულების შემდეგ ჟურნალისტებს ადვოკატმა ტარიელ კაკაბაძემ და მოკლული მოზარდის მამამ ზაზა სარალიძემ უთხრეს.

"მოწმემ პირდაპირ დაადასტურა მირზა სუბელიანთან შეხვედრა. როდესაც სუბელიანი კალანდიების სახლში მივიდა, მიესალმა კიდეც მას. მ.კ-მ კი უთხრა, რომ ბიძაჩემი ხომ იცი რა მაგარი პროკურორია და ამ საქმეს თვითონ დაალაგებსო. მირზა სუბელიანზე სამართლებრივი დევნა აქამდე უნდა დაწყებულიყო, მაგრამ რადგან აქამდე არ დაიწყეს, ახლა კიდევ ერთი მოწმე ადასტურებს უკვე ამ საქმეში სუბელიანის უხეშ ჩარევას", - თქვა ზაზა სარალიძემ.

ამ ინფორმაციას მოზარდების მკვლელობის საქმის პროკურორი მარიკა გოგოხია უარყოფს და საპირისპიროს აცხადებს. მისი თქმით, ბრალდებულს, დაკითხვისას, არც ერთხელ არ უხსენებია ის ფაქტი, რომ მირზა სუბელიანმა მკვლელობის შესახებ რამე იცოდა. მის კომენტარს სააგენტო "ინტერპრესნიუსი" ავრცელებს.

„მისი ჩვენება ეწინააღმდეგება საქმეში დაკითხულ სხვა მოწმეთა ჩვენებებსა და მტკიცებულებებს. რაც შეეხება იმ პირებს, რომლებიც ახსენეთ, მის მიერ ამ გვარების დასახელება მოხდა, თუმცა, არა როგორც დანაშაულში უშუალო მონაწილე პირებისა. 
ბრალდებულმა მისი დაკითხვისას დაადასტურა, რომ შემთხვევის ადგილზე თან ჰქონდა გასაშლელი დანა, რომლის გამოყენებითაც ერთ-ერთ დაზარალებულს დაზიანება მიაყენა. რაც შეეხება უშუალოდ მირზა სუბელიანთან დაკავშირებულ საკითხებს, ბრალდებულმა იმდაგვარი სახის ინფორმაცია მოგვაწოდა, რომლის თანახმადაც, როცა სახლში შეხვდა მირზა სუბელიანს, მათ შორის არავითარ საუბარს ადგილი არ ჰქონია ამ ფაქტთან დაკავშირებით და ასევე, მან განაცხადა, რომ სახლში ვინც იმყოფებოდა, არც მათთან რაიმე საუბარს არ შესწრებია, რომელიც უშუალოდ მკვლელობას უკავშირდებოდა“, - განაცხადა პროკურორმა.

კითხვაზე იკვეთება თუ არა მირზა სუბელიანის საწინააღმდეგო მტკიცებულებად მ.კ-ს ნათქვამი - „ბიძაჩემი ყველაფერს მოაგვარებს“, მარიკა გოგოხიამ აღნიშნა, რომ ბრალდებულს არ დაუკონკრეტებია, თუ რომელ ბიძას გულისხმობდა ბრალდებულის თანამოსაუბრე. 

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა. 

შინაგან საქმეთა სამინისტროს ინფორმაციით, ხორავას ქუჩის ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. 

მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ აღკვეთის ღონისძიების სახით პატიმრობა შეუფარდა.