ადვოკატები მოზარდების მკვლელობაზე საქმის მასალების გასაჯაროებას აპროტესტებენ

თბილისში, ხორავას ქუჩაზე მოზარდების მკვლელობასთან დაკავშირებით პროკურატურის მიერ სისხლის სამართლის საქმის მასალების გასაჯაროებას ბრალდებულების ადვოკატები აპროტესტებენ. 

ადვოკატ ტარიელ კაკაბაძის თქმით, მასალების გამოქვეყნების უფლება არც ბრალდების და არც დაცვის მხარეს არ აქვს. მისი თქმით, საქმეში ბევრი მოწმე ცვლის ჩვენებებს და დაცვის მხარესაც შეეძლო ისინი გამოექვეყნებინა, მაგრამ იმიტომ არ გააკეთეს ეს, რომ კანონის დარღვევა არ სურდათ. ამასთან, ამ ინფორმაციის გავრცელებას საზოგადოების მხრიდან, კაკაბაძის თქმით, მძიმე რეაქცია მოჰყვებოდა. 

"თუმცა, ბრალდების მხარეს არ აინტერესებს, არღვევს თუ არა კანონს და სურთ, გარკვეული პიარი გააჩაღონ და საზოგადოება დაარწმუნონ მათი პოზიციის მართებულობაში. თუმცა, საზოგადოებამ უკვე კარგად დაინახა, რომ ბრალდების მხარის პოზიცია სრულიად უსაფუძვლოა. რაც მთავარია, დაზარალებულმა ძალიან კარგად დაინახა, რომ ბრალდების პოზიცია ფაქტებს, მტკიცებულებებს არ ეფუძნება და ძალიან შორს არის ჭეშმარიტებისგან", - განაცხადა ტარიელ კაკაბაძემ.

ადვოკატის თქმით, ბრალდების მხარეს საზოგადოება შეცდომაში შეჰყავს.

დაცვის მხარის წევრები პროკურატურის მიერ მაკრატელთან დაკავშირებით გაკეთებულ განცხადებასაც აპროტესტებენ, მათი თქმით, მკვლელობის მომენტში მაკრატლის გამოყენება მხოლოდ ექსპერტის ვარაუდი იყო. 

"რაც შეეხება მაკრატელს, რომელიც საქმეში ფიგურირებს, შემიძლია გავაკეთო განმარტება, ექსპერტს არსად არ უთქვამს, რომ გამოყენებულია მაკრატელი, არც დასკვნაში წერია მსგავსი რამ, არც ინტერვიუს დროს უთქვამს მსგავსი რამ, არც სასამართლოში დაკითხვის დროს უთქვამს მსგავსი რამე. ექსპერტმა თქვა, რომ გამოყენებულია სხვადასხვა მჭრელი ბასრი საგანი, რომელზეც ექსპერტი აცხადებს, რომ საქმეში არსებული დანები არ არისო. თუმცა ამ საგნებში შესაძლებელია რომელიმე მაკრატლის მსგავსი საგანი იყოსო, ეს თქვა ექსპერტმა. აპრიორი, საქმეში მაკრატელია გამოყენებულიო, ასეთი რამ ექსპერტს არსად უთქვამს. ბრალდების მხარის განმარტებები აღნიშნულთან დაკავშირებით, მიზნად ისახავს რომ საზოგადოება შეცდომაში შეიყვანოს. დარწმუნებული ვარ, ბრალდების მხარემ კაგად იცის რა თქვა ექსპერტმა, თუმცა, განმარტებებს შეგნებულად არასწორად აკეთებენ, რათა სურთ გაამართლონ თავიანთი არასწორად გამოძიებული სისხლის სამართლის საქმე", -  განაცხადა ტარიელ კაკაბაძემ.

მთავარმა პროკურატურამ ხორავას ქუჩაზე მოზარდების მკვლელობასთან დაკავშირებით, შემთხვევის ადგილის ვიდეოკადრები გაასაჯაროვა და საქმის დეტალები განმარტა.  კადრებზე აღბეჭდილია ის ადგილები, სადაც დაპირისპირება მოხდა, ასევე ნაჩვენებია ნივთმტკიცებები, რომლებიც საქმეში დევს, მათ შორის დანა, რომლითაც მოზარდები მოკლეს.