შსს: პარლამენტთან დაკავებული 6 მოქალაქიდან ერთი ძებნილი და ერთიც პირობითი მსჯავრის ქვეშ მყოფია

შინაგან საქმეთა სამინისტროს მიერ პარლამენტის წინ მიმდინარე აქციის დროს ადმინისტრაციული წესით დაკავებული 6 მოქალაქიდან ერთი ძებნილი და ერთიც პირობითი მსჯავრის ქვეშ მყოფია- ამის შესახებ შინაგან საქმეთა სამინისტროს განცხადებაში წერია, რომელიც უწყების ვებგვერდზე გამოქვეყნდა.

"ქურდობისთვის ძებნილი, 1994 წელს დაბადებული ი.ა. და პირობითი მსჯავრის ქვეშ მყოფი, 1994 წელს დაბადებული გ.ა. პოლიციამ პარლამენტის შენობის წინ გაშლილ კარავში, აქციის მონაწილეებს შორის შელაპარაკების დროს დააკავა.

შინაგან საქმეთა სამინისტროს საპატრულო პოლიციის დეპარტამენტის თანამშრომლებმა მიმდინარე წლის 11 ივნისს თბილისში, რუსთაველის გამზირზე, პარლამენტის შენობასთან გამართულ აქციაზე, პოლიციელის კანონიერი მოთხოვნისადმი დაუმორჩილებლობის ფაქტზე, საქართველოს ადმინისტრაციულ სამართალდარღვევათა კოდექსის 173-ე მუხლით დააკავეს 6 პირი: 1987 წელს დაბადებული მ.ა., 1980 წელს დაბადებული ნ.კ., 1994 წელს დაბადებული გ.ა., 1994 წელს დაბადებული ი.ა., 1981 წელს დაბადებული მ. ლ. და 2001 წელს დაბადებული გ.ტ,"- წერია განცხადებაში.

დღეს პოლიციისთვის დაუმორჩილებლობის გამო პოლიციამ 3 კაცი დააკავა, მანამდე კი  ზვიად კუპრავა და კიდევ 3 პირი დააკავეს.

ამ წუთებში სასამართლო კუპრავასა და მასთან ერთად დაკავებულების საქმეს განიხილავს.

ამ დროს სამართალდამცველებმა რუსთაველის გამზირზე პარლამენტის წინ დადგმული კარვები საავტომობილი გზიდან გადაიტანეს. შესაბამისად, რუსთაველის გამზირზე მოძრაობა აღდგა.

პარლამენტის წინ გამართული აქციის მიზანი, როგორც თავად „ერთიანი ნაციონალური მოძრაობის“, „ეროვნულ-დემოკრატიული პარტიის“, „სახელმწიფო ხალხისათვის“, „ახალი საქართველოსა“ და „ლეიბორისტული პარტიის“ ლიდერები ამბობენ, ზაზა სარალიძისა და მალხაზ მაჩალიკაშვილისთვის სოლიდარობის გამოცხადებაა. 

ევროპული საქართველო დღეს დაგეგმილ აქციაში მონაწილეობას არ მიიღებს.

მანამდე ხორავას ქუჩაზე სისხლიანი გარჩევისას გარდაცვლილი დავით სარალიძის მამამ ხელისუფლებას საქმის გამოძიებისთვის ვადა 10 ივნისამდე მისცა. წინააღმდეგ შემთხვევაში, მან განაცხადა, რომ პარლამენტთან მასობრივ აქციებს განაახლებდა.

რამდენიმე დღის წინ შსს-მ ხორავას ქუჩაზე მომხდარი მკვლელობის საქმის ერთ-ერთი ფიგურანტის მამა, მირზა სუბელიანი მკვლელობის შეუტყობინებლობისთვის სისხლის სამართლის კოდექსის 376-ე მუხლით დააკავა. შსს-ს ინფორმაციით, სუბელიანი ბრალს აღიარებს.