შსს ოზურგეთში ავტომანქანის დაწვასთან დაკავშირებით ინფორმაციას ავრცელებს

შინაგან საქმეთა სამინისტროს გურიის პოლიციის დეპარტამენტში, ოზურგეთში, ავტომანქანის დაზიანების ფაქტზე გამოძიება სსკ-ის 187-ე მუხლით დაიწყო, რაც ნივთის დაზიანებას ან განადგურებას გულისხმობს. ინფორმაციას შინაგან საქმეთა სამინისტრო ავრცელებს.

დანაშაული 3-დან 5 წლამდე ვადით თავისუფლების აღკვეთას ითვალისწინებს. 

უწყების ცნობით, გამოძიებამ დაადგინა, რომ მიმდინარე წლის 10 ივლისს, ოზურგეთში, პეტრიწის ქუჩაზე მდგარ „მიცუბიშის“ ფირმის ავტომანქანას გაუჩნდა ცეცხლი. ავტომანქანის პირველადი დათვალიერებით, დადგინდა, რომ ავტომანქანის სალონი ნაწილობრივ დაზიანდა.

„მომხდართან დაკავშირებით საგამოძიებო ღონისძიებები მიმდინარეობს. გამოკითხულია დაზარალებული და ავტომობილს შესაბამისი ექსპერტიზა უტარდება“, - აცხადებენ შსს-ში.

ერთ-ერთი ვერსიით, დაუდგენელმა პირებმა საცხოვრებელ კორპუსთან გაჩერებულ ავტომობილში ხელყუმბარა შეაგდეს და ააფეთქეს. მანქანა ამავე ქუჩაზე მცხოვრებ კიღურაძეების ოჯახს ეკუთვნოდა. ოჯახი ვერსიებზე ლაპარაკისაგან თავს იკავებს.