კოჯრის სამხედრო ბაზაზე ჯარისკაცების დაჭრის საქმეზე ორ პირს პატიმრობა შეეფარდა

სამხედრო პოლიციის დეპარტამენტის თანამშრომლებმა, სასამართლოს განჩინების საფუძველზე, კოჯრის სამხედრო ბაზაზე მომხდარი ჩხუბის დროს სამხედრო მოსამსახურეების ჯანმრთელობის განზრახ მძიმე დაზიანების ფაქტზე, სავალდებულო სამხედრო მოსამსახურეები დააკავეს. ინფორმაციას პროკურატურა ავრცელებს.

უწყების ინფორმაციით, საქმეზე ჩატარებული გამოძიებით დადგინდა, რომ თბილისში, დაბა კოჯორში მდებარე გიორგი ანწუხელიძის სახელობის სერჟანტთა მომზადების აკადემიის ტერიტორიაზე, სავალდებულო სამხედრო მოსამსახურეებს შორის ურთიერთშელაპარაკებისას, ბრალდებულებმა ჯანმრთელობის დაზიანება მიაყენეს ამავე სამხედრო ნაწილის სამ სავალდებულო სამხედრო მოსამსახურეს.

„დაკავებულთაგან ერთ პირს ბრალდება წარედგინა სისხლის სამართლის კოდექსის 117-ე მუხლის პირველი ნაწილით, ხოლო მეორე ბრალდებულს - 117-ე მუხლის მე-7 ნაწილის „ა“ ქვეპუნქტით, რაც ცხრიდან ცამეტ წლამდე თავისუფლების აღკვეთას ითვალისწინებს.

2018 წლის 31 აგვისტოს, თბილისის საქალაქო სასამართლომ სრულად გაიზიარა პროკურატურის შუამდგომლობა და ბრალდებულებს აღკვეთის ღონისძიების სახით შეუფარდა პატიმრობა.

სისხლის სამართლის საქმეზე გრძელდება გამოძიება დანაშაულში შესაძლო მონაწილე სხვა პირთა მხილების მიზნით“, - აცხადებენ მთავარ პროკურატურაში.

მომხდარ ინციდენტთან დაკავშირებით, თავდაცვის სამინისტროს გენერალური შტაბისა და თავდაცვის მინისტრის გადაწყვეტილებით, აკადემიის მეთაური ვიცე-პოლკოვნიკი ზ.ზ., აკადემიის სერჟანტი, მთავარი სერჟანტი გ. ბ. , საშტაბო და უზრუნველყოფის ასეულის მეთაური მაიორი ა. რ. , ასეულის მეთაურის მოადგილე უფროსი ლეიტენანტი ვ. მ. და ასეულის სერჟანტის მოვალეობის შემსრულებელი სერჟანტი ა.გ. გაათავისუფლეს თანამდებობიდან.

სამხედრო მოსამსახურეების დაჭრის ფაქტი პირველი აგვისტოს, საღამოს 6 საათზე მოხდა. 

კოჯრის სამხედრო ბაზაზე დაჭრილი ოთხი ჯარისკაცი ინგოროყვას სახელობის საუნივერსიტეტო კლინიკაში გადაიყვანეს. ერთ-ერთ ჯარისკაცს კი ოპერაცია გაუკეთდა.