კომპანია „სვეტის“ საქმეზე დაკავებულები სასამართლომ პატიმრობაში დატოვა

კომპანია "სვეტის" საქმეზე დაკავებულები პატიმრობაში რჩებიან. მოსამართლემ ბრალდების შუამდგომლობა დააკმაყოფილა. გივი ჯიბლაძე და თორნიკე ჯანელიძე წარდგენილ ბრალდებას არ ეთანხმებიან. ამბობენ რომ მენაშენეთა კუთვნილი თანხების უკან დაბრუნებას აპირებდნენ.

"დაზარალებულებს ნელ-ნელა დავუბრუნე თანხები. ეს მოწმობს იმას, რომ სანამ ყადაღები დაედებოდა ვცდილობდი თანხების დაბრუნებას,"- თქვა გივი ჯიბლაძემ

როგორც ჯანელიძემ თქვა, მათი ინტერესია ყველა დაზარალებულის დაკმაყოფილება.

"29 მაისიდან ივნისამდე ჩვენთან არავითარი საგამოძიებო მოქმედება არ ჩატარებულა. შემდეგ დაგვიბარეს დაკითხვაზე და ივნისის ბოლოს დამკითხეს, როცა დამიბარეს არ ვიყავი თბილისში და როცა ჩამოვედი მაშინვე გამოვცხადდი ფინანსთა სამინისტროს საგამოძიებო სამსახურში. ვთანამშრომლობთ მაქსიმალურად გამოძიებასთან, რასაც მოწმობს საგამოძიებო მოქმედებები, კერძოდ სხვადასხვა შპს-ებიდან დოკუმენტაციის ამოღება ჩვენი მონაწილეობით და ამასთან მოგვიანებით ისინი ჩვენ თავად წარვადგინეთ საგამოძიებო უწყებაში,"- განმარტა ჯანელიძემ.

"საგამოძიებო მოქმედებების შედეგად მოპოვებული მტკიცებულებებით დგინდება, რომ ბრალდებულებმა გ.ჯ.-მ და თ.ჯ.-მ,  სამსახურებრივი მდგომარეობის გამოყენებით, განიზრახეს მართლსაწინააღმდეგო მისაკუთრების მიზნით მოტყუებით დაუფლებოდნენ მოქალაქეთა კუთვნილ დიდი ოდენობით თანხებს. სწორედ ამ  მიზნით, დეველოპერული კომპანია „სვეტის“ მიერ 2016 წლის დასაწყისში დაანონსდა მასშტაბური ბინათმშენებლობის პროექტების დაწყება ისე, რომ კომპანიას მშენებლობის შესაბამისი ნებართვები არ ჰქონდა მიღებული. დიდი ოდენობით თანხის მოსაზიდად, ჩატარდა აქტიური სარეკლამო კამპანიაც, მათ შორის სოციალური ქსელების გამოყენებით, რითაც მოხდა  ბინის შეძენით დაინტერესებული როგორც ადგილობრივი ასევე, საზღვარგარეთ მცხოვრები მოქალაქეების მოზიდვა,"- წერია ფინანსთა სამინისტროს საგამოძიებო სამსახურის განცხადებაში.

კომპანია "სვეტის" დირექტორი გივი ჯიბლაძე თავის სახლში დააკავეს.