შსს: გავრცელებული ინფორმაცია უწყებიდან 9 თანამშრომლის გათავისუფლებაზე სიცრუეა

შინაგან საქმეთა სამინისტრო გავრცელებულ ინფორმაციას, ბერა ივანიშვილის მოთხოვნით შსს-დან 9 თანამშრომლის დათხოვნის შესახებ, სიცრუეს უწოდებს. ამასთან დაკავშირებით უწყებამ სპეციალური განცხადება გავრცელა.

"გვსურს, გამოვეხმაუროთ მედიასაშუალებებით გავრცელებულ ინფორმაციას იმის თაობაზე, რომ, ბერა ივანიშვილთან დაკავშირებული ინციდენტის გამო, შსს-ს თბილისის პოლიციის დეპარტამენტის ძველი თბილისის სამმართველოდან დათხოვნილი იქნა 9 თანამშრომელი. აღნიშნული ინფორმაცია სრული სიცრუეა. კატეგორიულად ვაცხადებთ, რომ თბილისის პოლიციის დეპარტამენტის არც ერთ სამმართველოში ბერა ივანიშვილთან დაკავშირებით მომხდარ ინციდენტს ადგილი არ ჰქონია და არ ფიქსირდება არც ერთი ფაქტი, რომელსაც აღნიშნულ პირთან რაიმე სახით შემხებლობა ექნებოდა.

ამასთან, სიმართლეს არ შეესაბამება ინფორმაცია იმის თაობაზეც, რომ თბილისის პოლიციის დეპარტამენტის ძველი თბილისის სამმართველოდან დათხოვნილი იქნა 9 თანამშრომელი. აქვე განვმარტავთ, რომ პოლიციის დეპარტამენტებსა და სამმართველოებში, ოპერატიული საქმიანობის სპეციფიკიდან და სხვა ობიექტური მიზეზებიდან გამომდინარე, საკადრო გადაადგილებები პერიოდულად ხორციელდება.

ამასთან, შევნიშნავთ, რომ არც ერთ პირს, ვინც, თითქოსდა, მომხდარ ინციდენტთან დაკავშირებით მედიასაშუალებებით კომენტარს აკეთებს, არანაირი შეხება არ აქვს შინაგან საქმეთა სამინისტროსთან. შესაბამისად, ჩნდება საფუძვლიანი ეჭვი, რომ მსგავსი განცხადებები მხოლოდ შსს-ს დისკრედიტაციას და კონკრეტულ პოლიტიკურ მიზნებს ემსახურება", - ნათქვამია შსს-ს მიერ გავრცელებულ განცხადებაში.

18 მარტს ნუგზარ წიკლაურმა განაცხადა, რომ 4 თებერვალს, შარდენზე ჩხუბის შედეგად, საპატრულო პოლიციამ დააკავა ერთი მოქალაქე, რომელიც შინაგან საქმეთა სამინისტროს თანამშრომელი იყო. საპატრულო პოლიციამ ყოფილი პრემიერის შვილისგან, ბერა ივანიშვილისგან დაკავებულის გათავისუფლების შესახებ ბრძანება მიიღო, თუმცა, ბრძანება არ შესრულდა, რის გამოც მინისტრმა სამსახურიდან 9 თანამშომელი გაათავისუფლა.

ამავე დღეს წიკლაურის განცხადებას facebook-ის საკუთარ გვერდზე ბერა ივანიშვილი გამოეხმაურა და განაცხადა, რომ "ნაციონალური მოძრაობის" წევრის მიერ გავრცელებული ინფორმაცია სირუე იყო.

დღეს არასამთავრობო ორგანიზაციამ - "საქართველოს პოლიციელთა ასოციაციამ" მთავარ პროკურატურაში განცხადება შეიტანა და მოითხოვა, პროკურატურამ გამოიძიოს შინაგან საქმეთა სამინისტროს მაღალჩინოსნების შესაძლო უფლებამოსილების გადამეტების საკითხი.