მეორე ქვეითი ბრიგადის 22-ე ბატალიონი „მტკიცე მხარდაჭერის“ მისიაში ჩაერთო

საქართველოს შეიარაღებული ძალების II ქვეითი ბრიგადის 22-ე ბატალიონი „მტკიცე მხარდაჭერის“ მისიაში ოფიციალურად ჩაერთო. ქვედანაყოფმა ბაგრამის საავიაციო ბაზისა და მიმდებარე ტერიტორიის დაცვის ამოცანა  I ქვეითი ბრიგადის მე-11 ბატალიონისგან სრულად ჩაიბარა.  ინფორმაციას თავდაცვის სამინისტრო ავრცელებს.

უფლებამოსილების გადაბარების ცერემონიალი ბაგრამის საავიაციო ბაზაზე გაიმართა. ღონისძიება საქართველოს, ამერიკის შეერთებული შტატების  და ავღანეთის რესპუბლიკის სახელმწიფო ჰიმნებით დაიწყო. შეკრებილმა საზოგადოებამ წუთიერი დუმილით პატივი მიაგო საერთაშორისო მისიებში დაღუპული ჯარისკაცების, ასევე სამოქალაქო პირთა ხსოვნას.

პირად შემადგენლობას სიტყვით ტაქტიკური დაჯგუფების  „მანჩუს“ მეთაურმა, ვიცე პოლკოვნიკმა დევიდ უთლაუთმა და საქართველოს შეიარაღებული ძალების უფროსმა სამხედრო წარმომადგენელმა, პოლკოვნიკმა კახა ტაბატაძემ  მიმართეს. მათ მე-11 ბატალიონს საერთაშორისო ოპერაციით გათვალისწინებული ამოცანების განხორციელებისათვის მადლობა გადაუხადეს  და 22-ე ბატალიონს მისიის წარმატებით შესრულება უსურვეს.

II ქვეითი ბრიგადის 22-ე ბატალიონი ბაგრამის საავიაციო ბაზაზე, აშშ-ის სარდლობის დაქვემდებარებაში „მტკიცე მხარდაჭერის“ მისიას 7 თვის განმავლობაში შეასრულებს. ქართველი სამხედროების ამოცანა ბაზის შიდა და გარე პერიმეტრის დაცვა და უსაფრთხოების უზრუნველყოფა იქნება.