პოლიცია ბათუმში მოსწავლეების პირადი ცხოვრების ამსახველი კადრების გავრცელებას იძიებს

პოლიციამ ინტერნეტში ბათუმის ერთ-ერთი საჯარო სკოლის მოსწავლების პირადი ცხოვრების ამსახველი კადრების გავრცელებასთან დაკავშირებით გამოძიება დაიწყო. 

პოლიციელები სკოლის მოსწავლეებს მომხდართან დაკავშირებით კითხავენ. არსებული ინფორმაციით, პირადი ცხოვრების ამსახველი ვიდეო მოსწავლეების ჯგუფში გავრცელდა. ვიდეოს ნახვა ამ ჯგუფში მყოფ პირებს შეეძლოთ ენახათ, მათ შორის არასრულწლოვნებს. შემთხვევა გასულ კვირას მოხდა.

imedinews-ის ინფორმაციით, ვიდეოში მონაწილე მოსწავლეების მშობლებს სკოლიდან ბავშვების გადაყვანაზე განცხადება უკვე დაწერილი აქვთ. 

"ერთ-ერთი კერძო სკოლის მიერ დღეს მოწოდებული იქნა ინფორმაცია, რომ სოციალურ ქსელში დახურულ ჯგუფში გავრცელდა ვიდეო. სავარაუდოდ ეს ვიდეო ეხება ამ სკოლის მოსწავლეებს. ამის შემდგომ სკოლამ დაიბარა მშობლები და მშობლებს მიაწოდა ინფორმაცია . ასევე სკოლამ ინფორმაცია მიაწოდა სოც. სააგენტოს და სამართალდამცავ ორგანოებს. ამ მომენტისთვის მშობლებმა დაწერეს განცხადებები და თავიანთი შვილების გადაყვანა სურთ ამ სკოლიდან. ეს ვიდეო გადაღებულია არა სასკოლო დროს, სკოლის გარეთ. სავარაუდოდ მშენებარე კორპუსში", - განაცხადა აჭარის რესურსცენტრის ხელმძღვანელმა გოჩა დავითაძემ.

მომხდართან დაკავშირებით განცხადებას შსს-ც ავრცელებს. უწყებაში ამბობენ, რომ გამოძიება სისხლის სამართლის კოდექსის 141-ე მუხლის პირველი ნაწილით და 157-ე მუხლის პირველი ნაწილით მიმდინარეობს.

"დგინდება დანაშაულის ფაქტობრივი გარემოებები. საზოგადოებას შევახსენებთ, რომ მოქმედი კანონმდებლობით სისხლის სამართლის წესით ისჯება როგორც პირადი ცხოვრების ამსახველი კადრების ინტერნეტ სივრცეში ატვირთვა, ისე მისი შენახვა და ნებისმიერი ფორმით გავრცელება. კადრების შენახვა და გავრცელება ხელს უწყობს პირადი ცხოვრების ხელყოფის დანაშაულის მასშტაბების ზრდას. შესაბამისად, სრულიად მიუღებელია ბოლო პერიოდში გავრცელებული სპეკულაციები იმასთან დაკავშირებით, რომ დანაშაულია მხოლოდ კადრების შექმნა და ატვირთვა, ხოლო კადრების შენახვა და გავრცელება ნაკლებად მძიმე ფაქტია და სამართალდამცავები ასეთი ფაქტების მიმართ ლოიალურები უნდა იყვნენ. მითუმეტეს იმ პირობებში, როცა მოქმედი კანონმდებლობით ისჯება როგორც კადრების ატვირთვა, ისე შენახვა და გავრცელება. ცხადია, ასეთი სპეკულაციები მხოლოდ ახალისებს ახალი დანაშაულის ჩადენას, მათ შორის არასრულწლოვანთა შორის.

შესაბამისად, კიდევ ერთხელ მოვუწოდებთ საზოგადოებას, მსგავსი კადრების მიღების შემთხვევაში, არ შეინახოთ და არ გაავრცელოთ აღნიშნული მასალა, დაუყოვნებლივ წაშალეთ და აცნობეთ სამართალდამცავ ორგანოებს. ნუ გახდებით დანაშაულის თანამონაწილეები. წინააღმდეგ შემთხვევაში, სამართალდამცავი ორგანოები იძულებული იქნებიან დააყენონ როგორც ვიდეოს ამტვირთავის, ისე მისი შემნახავის და გამავრცელებლის პასუხისგებლობის საკითხი", - აცხადებენ შსს-ში.