შავგულიძე: ჩვენ თვალს ვუსწორებთ იმ ფაქტს, რომ პარლამენტის წევრი ხელისუფლების კანდიდატი იქნება

„ევროპული საქართველო-თავისუფალი დემოკრატების“ კანდიდატი მთაწმინდაზე შალვა შავგულიძე შუალედური არჩევნების შედეგებს აფასებს. მისი თქმით, ეს იყო ხელისუფლების მხრიდან ძალიან ცუდად ჩატარებული, დემოკრატიისთვის მიუღებელი არჩევნები.

შავგულიძე ხელისუფლებას „იმედის“ ეთერით მის წინააღმდეგ ბინძური კამპანიის წარმოებაში ადანაშაულებს.

„ჩვენ თვალს ვუსწორებთ იმ ფაქტს, რომ პარლამენტის წევრი ხელისუფლების კანდიდატი იქნება“, - თქვა შავგულიძემ თანაგუნდელებთან ერთად გამართულ ბრიფინგზე და აღნიშნა, რომ მიუხედავად ამისა, ვერ მიულოცავს ლადო კახაძეს გამარჯვებას, რადგან დემოკრატიისთვის მიუღებელი მეთოდებით ჩატარდა არჩევნები.

ცეკოს ჯერ არ გამოუცხადებია ოფიციალური მონაცემები. 

თბილისის მერის, „ქართული ოცნების“ გენერალური მდივნის კახა კალაძის ინფორმაციით, შუალედური არჩევნების მეორე ტურში ხმების 75 % დათვლილია და დიდი უპირატესობით მმართველი პარტიის კანდიდატი ლიდერობს.

ამით კალაძემ უპასუხა ოპოზიციას, რომელმაც დედაქალაქის მერს უპასუხისმგებლო უწოდა, რადგან „ლადო კახაძეს წინასწარ მიულოცა გამარჯვება“.  

„ახლა მიმდინარეობს ხმის დათვლის პროცესი და მინდა, ვუპასუხო იმ ადამიანებს, რომლებმაც ჩემი განცხადება უპასუხისმგებლოდ შეაფასეს. მათ მინდა მივაწოდო ინფორმაცია. ხმების 75 % დათვლილია, 62, 5 %, ლადო კახაძის არის, 32,5 % შალვა შავგულიძის. კიდევ ერთხელ მინდა მივულოცო დამაჯერებელი გამარჯვება. ეს არის პასუხი იმ ადამიანებისთვის, ვინც ცდილობდა, სიცრუეზე დაფუძნებული კამპანია ეწარმოებინა“, - თქვა კალაძემ მმართველი პარტიის ოფისში გამართულ ბრიფინგზე. 

მთაწმინდის მაჟორიტარულ ოლქში გახსნილ საარჩევნო უბნებზე ხმის მიცემის პროცესი დასრულდა, ყველა უბანი 20:00 საათზე დაიხურა.

19 მაისს, პარლამენტის შუალედურ არჩევნებში მთაწმინდის ოლქში კენჭისყრის შედეგად 50%-იანი ბარიერი ვერცერთმა კანდიდატმა ვერ გადალახა. არჩევნების პირველ ტურში „ქართული ოცნების“ კანდიდატმა ლადო კახაძემ ხმათა 41,01% მიიღო, მეორე ადგილზე (36,84%) კი „ევროპული საქართველოს“ და „თავისუფალი დემოკრატების“ კანდიდატი შალვა შავგულიძე გავიდა.