რუსი დეპუტატების საქართველოში ვიზიტი ქუთაისში გააპროტესტეს

„რუსეთი ოკუპანტია“, “თავისუფლებასთან წააგებთ“, - ამ ლოზუნგებით ქუთაისის მერიის წინ აქცია მიმდინარეობს. აქციის მონაწილეები რუსი დეპუტატების საქართველოში და პარლამენტში ვიზიტს აპროტესტებენ.

მათი თქმით, დაუშვებელია ოკუპანტების საკანონმდებლო ორგანოში მისვლა და თავმჯდომარის სავარძელში მოკალათება.

„ვაპროტესტებთ რუსი დეპუტატების საქართველოში, მით უმეტეს პარლამენტში ვიზიტს. წარმოუდგენელი რამ მოხდა დღეს. დაუშვებელია, ის რომ პარლამენტის თავმჯდომარის სავარძელში მოკალათდა ადამიანი, რომელიც დასცინოდა ქართველ ხალხს. ქართველი ხალხი არ დაუშვებს პრორუსული ძალების გაბატონებას. ჩვენ უნდა დავანახოთ, რომ ოკუპანტების წინააღმდეგ ვართ“ - განაცხადეს აქციის მონაწილეებმა.

მერიის წინ მოქალაქეები, სხვადასხვა პარტიის წევრები და არასამთავრობო ორგანიზაციის წარმომადგენლები შეიკრიბნენ. მათი თქმით, ამ თემის ირგვლივ ყველა უნდა გაერთიანდეს.

საპროტესტო აქცია იმართება თბილისშიც.

პარლამენტში მომხდართან დაკავშირებით განცხადება გაავრცელა ბიძინა ივანიშვილმა, ასევე ირაკლი ღარიბაშვილმა და კახა კალაძემ. 

პარლამენტში მომხდარი ინციდენტის ოპოზიციის ნაწილი ირაკლი კობახიძის პასუხისმგებლობის საკითხის დაყენებას მოითხოვს. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

ირაკლი კობახიძის სკამიდან რუსი დეპუტატის მიმართვას პრეზიდენტი სალომე ზურაბიშვილი გამოეხმაურა. "რა მართლმადიდებლური კავშირი შეიძლება იყოს ოკუპანტ რუსეთთან, რომელიც ყველა ქრისტიანულ წესს ებრძვის?", - დაწერა სალომე ზურაბიშვილმა Facebook-ზე.

პარლამენტის სპიკერისთვის განკუთვნილი ადგილიდან, დელეგატებს ასამბლეის პრეზიდენტმა, რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

პარლამენტის ვიცესპიკერის, თამარ ჩუგოშვილის განცხადებით, პარლამენტის თავმჯდომარის სკამზე რუსი დეპუტატის ნახვამ "გაანადგურა". "ჩემთვის ყველა დღე იმაზე ფიქრში გადის პარლამენტი სრულად შემდგარ სახელმწიფო ინსტიტუციად როგორ ვაქციოთ. რუსი დეპუტატის ნახვამ თავმჯდომარის სკამში უბრალოდ გამანადგურა", - დაწერა თამარ ჩუგოშვილმა Facebook-ზე.

საპარლამენტო უმრავლესობის ლიდერმა არჩილ თალაკვაძემ კი კონფერენციის დაუყოვნებლივ შეწყვეტა მოითხოვა. 

რუსი დეპუტატის ქცევა "ევროპული საქართველოს" წევრებმაც გააპროტესტეს და მათ სპიკერატის ადგილი დაიკავეს.

თამარ ჩუგოშვილის შეფასებას გამოეხმაურა ზაქარია ქუცნაშვილი: "დიპლომატიური ქაჯობაა როცა ქვეყნის წინააღმდეგ ბრძოლა პერსონაზე დაგყავს", - თქვა ქუცნაშვილმა. 

თბილისი მართლმადიდებლობის საპარლამენტთაშორისო ასამბლეას მასპინძლობს. ღონისძიებაზე 25 ქვეყნის დელეგაციების წარმომადგენლები არიან ჩამოსულები.