კარასინი: ზურაბიშვილის განცხადება ჟენევის მოლაპარაკებებზე უარყოფითად აისახა

რუსეთის საგარეო საქმეთა მინისტრის მოადგილის გრიგორი კარასინის განცხადებით, ჟენევის მოლაპარაკებების 48-ე რაუნდზე ატმოსფერო დაძაბული იყო, რაც 20-21 ივნისის მოვლენებმა გამოიწვია. ამის შესახებ კარასინმა მოლაპარაკებების დასრულების შემდეგ განაცხადა. 

"მე ვიგრძენი, რომ თანათავმჯდომარეები ძალიან ნერვიულობდნენ, რადგან არ იცოდნენ იქნებოდა თუ არა შეხვედრაზე ღია კონფრონტაცია. ჩვენ გამოვთქვით მოსაზრებები და ამის შემდეგ შევთანხმდით, რომ ეს არ იყო დღის წესრიგით გათვალისწინებული. ჩვენ უნდა გავაგრძელოთ ჩვენი საქმე და თემების განხილვა. ეს არის უსაფრთხოება, ჰუმანიტარული ბლოკი, ძალის არგამოყენება და ასე შემდეგ. ყველა საკითხი განვიხილეთ, მაგრამ ასე გეტყოდით, მთავარი ვერ გადავწყვიტეთ. ეს არის სტატუსი და როგორც თქვენ ამბობთ, როგორც ეს თქვენი ინტერპრეტაციაა დეოკუპაცია. როდესაც ვუახლოვდებით ამ ძველ თემას, მაშინვე ტემპერატურა იწევა", - განაცხადა გრიგორი კარასინმა. 

გრიგორი კარასინის თქმით, "შეხვედრაზე გავლენა იქონია თბილისში რადიკალების განცხადებებმა, უპასუხისმგებლო განცხადებებმა თბილისიდან, დემონსტრაციებმა".

"მაგალითად, იყო სალომე ზურაბიშვილის განცხადება. სალომე ზურაბიშვილის განცახდებამ გამოიწვია ბომბის აფეთქების ეფექტი. ამას მოჰყვა დემონსტრანტების შეძახილები. ეს ყველაფერი ხომ ტელევიზიით გადაიცემოდა. ეს ვერ ჩაივლიდა შეუმჩნევლად", - თქვა კარასინმა. 

ასევე გრიგორი კარასინის განცხადებით, შეხვედრის დასრულების შემდეგ "კარგია და მისასლმებელია, რომ ყველამ ერთმანეთს ხელი ჩამოართვა":

"და შევთანხმდით, რომ შევხდებით ოქტომბერში ისევ აქ. რატომ გამოიწვია ბომბის აფეთქების ეფექტი? მე ვარ ერთ-ერთი მათგანი, ვისზეც ამ აფეთქებამ იმოქმედა. მეზობელმა სახელმწიფოების ორმხრივ ურთიერთობებში სახელმწიფო მეთაურმა საკუთარ თავს არ უნდა მისცეს უფლება ასეთი გამონათქვამების. ამ საკითხებს უნდა ფრთხილად მოვეკიდოთ და გამონათქვამები კარგად შევარჩიოთ", - განაცხადა გრიგორი კარასინმა. 

შეხვედრის დასრულების შემდეგ საქართველოს საგარეო საქმეთა მინისტრის მოადგილემ ლაშა დარსალიამ განაცხადა, რომ ეს რაუნდიც ისევე ჩაიშალა, როგორც წინა რაუნდი. 

ჟენევაში მოლაპარაკებების 48-ე რაუნდი 2 ივლისს დაიწყო.

საქართველოს პრეზიდენტმა სალომე ზურაბიშვილმა თბილისში მიმდინარე მოვლენების შეფასებისას euronews-სთან ინტერვიუში განაცხადა, რომ რუსეთთან პრობლემები აქამდეც გვქონდა, მაგრამ ამას ხელი არ შეუშლია 1,5 მილიონი ტურისტისთვის, რომლებიც რუსეთიდან საქართველოში ჩამოვიდნენ და ყოველგვარი ინციდენტების გარეშე დაბრუნდნენ სამშობლოში. 

"ტურისტები კვლავ უნდა ჩამოვიდნენ საქართველოში, იმიტომ რომ მათ უყვართ საქართველო. პოლიტიკოსებმა და ქვეყნის ლიდერებმა არსებული პრობლემები უნდა მოაგვარონ, ჩვენ საქართველოს ტერიტორიები გვაქვს დასაბრუნებელი, მაგრამ ამან არ უნდა შეუშალოს ხელი ტურიზმს. ჩვენ დეესკალაცია გვჭირდება - არც საქართველოს და არც ევროკავშირს რეგიონში დაძაბულობის ახალი წერტილი არ სჭირდება. დაძაბულობის შექმნის ნებისმიერ მცდელობებს ჩვენ კვლავ მშვიდობიანი ზომებით ვუპასუხებთ“ - განაცხადა ზურაბიშვილმა.