როგორ აფასებენ პოლიტიკოსები და ექსპერტები ხაზარაძის გადაწყვეტილებას

„ნაციონალური მოძრაობის“ ერთ-ერთი ლიდერი რომან გოცირიძე მიესალმება ყველა საზოგადოებრივი თუ პოლიტიკური ძალის გამოჩენას, რომელიც ხელს შეუწყობს ბიძინა ივანიშვილის ოლიგარქიული მმართველობის დასრულებას.

ამით გოცირიძე საზოგადოებრივი მოძრაობის შექმნის შესახებ „თიბისი ბანკის“ დამფუძნებლის, მამუკა ხაზარაძის გადაწყვეტილებას გამოეხმაურა. 

დეპუტატის აზრით, მამუკა ხაზარაძეს აქვს სოციალური თუ სხვა რესურსი, რომელიც საკმაოდ წონადს ხდის იმისათვის, რომ სისტემის დემონტაჟში საკუთარი წვლილი შეიტანოს.

„ივანიშვილი არის ბოლო ძალა, რომელიც ქვეყანას რუსეთის ორბიტაზე დასაბრუნებლად უბიძგებს. მისი ჩამოშორება ნიშნავს საქართველოს ევროპულ გზაზე მყარად და შეუქცევადად დადგომას. ამიტომ დღეს მეორეხარისხოვანია იმის გარკვევა, თუ რამ უბიძგა მამუკა ხაზარაძეს ამ ნაბიჯის გადასადგმელად - პირადი ინტერესების შელახვამ, შურისძიებამ თუ ქვეყნის წინაშე არსებული სერიოზული რისკების გაცნობიერებამ. მთავარია, რომ მან სწორი არჩევანი გააკეთა! ხაზარაძის გამოჩენა საზოგადოებრივ-პოლიტიკურ ასპარეზზე სრულად ეთანხმება ჩვენი პარტიის გაცხადებულ პრინციპს - ყველა ერთის წინააღმდეგ! მხოლოდ ასე შეიძლება რუსეთის მიერ ფინანსურად, პოლიტიკურად და აგენტურულად ზურგგამაგრებული ოლიგარქის დამარცხება”,  - განაცხადა რომან გოცირიძემ.

„როდესაც მამუკა ხაზარაძემ შს მინისტრთან დაკავშირებით პარლამენტში ძალიან მკვეთრი განცხადება გააკეთა, მას უკვე ნათლად ჰქონდა დანახული, როგორ უნდა გაეგრძელებინა თავისი საქმიანობა“,  - განაცხადა თავდაცვის ყოფილმა მინისტრმა თინა ხიდაშელმა.

მან იმედი გამოთქვა, რომ ხაზარაძის მიერ შექმნილი მოძრაობა „ერთ კაცზე ჩამოკიდებული“ არ იქნება, როგორც, მისი თქმით, ამ ქვეყანაში ხდება ხოლმე.

მისივე თქმით, მამუკა ხაზარაძემ ეს ნაბიჯი „თიბისი ბანკის“ გარშემო შექმნილი სიტუაციიდან გამომდინარე გადადგა. ხიდაშელის განცხადებით, ხაზარაძემ სწორი არჩევანი გააკეთა, როდესაც სახლში ჩუმად ჯდომის ნაცვლად, საზოგადოებრივად აქტიურ ადამიანად ყოფნა არჩია.

მამუკა ხაზარაძის გადაწყვეტილებას „ევროპული საქართველოს“ ერთ-ერთი ლიდერი გიგა ბოკერიაც აფასებს. 

„ეს ჩვეულებრივი, ბუნებრივი და ნორმალური პროცესია. თუ ჩვენს ქვეყანაში სამოქალაქო მოძრაობა ან რაიმე პოლიტიკური გუნდი იქნება, თუ ფუნდამენტურ და საკვანძო ღირებულებებში ეს მოძრაობა დგას ჩვენთვის პრინციპულ საკითხებთან დაკავშირებით იმავე პოზიციებზე, მაშინ ძალიან კარგი. ჯერჯერობით არ ვიცნობ, რა შინაარსი აქვს ამ მოძრაობას“, - თქვა პოლიტიკოსმა. 

„რადგანაც არსებობს ე.წ. მესამე ძალის მოლოდინი, ამ თვალსაზრისით ხაზარაძის მოძრაობა შეიძლება ყველაზე პერსპექტიული აღმოჩნდეს, თუმცა სანახავია, რა საზოგადოება შეიკრიბება მის გარშემო“, - მიიჩნევს პოლიტოლოგი ვახტანგ ძაბირაძე. 

მისივე თქმით, მამუკა ხაზარაძისგან ხელისუფლებამ, ოპოზიციამ და თავად გარემოებამ შექმნა დასავლური ტიპის, ევროპული მიმართულების ლიდერი, რომელიც სათავეში ჩაუდგა ანაკლიის პორტის მშენებლობას და ხელისუფლებას დაუპირისპირდა. მისი განმარტებით, ხაზარაძეს წინასწარ აქვს ფონი, შექმნას საზოგადოებრივი მოძრაობა.

„გულწრფელად ველოდი, რომ მამუკა ხაზარაძე პოლიტიკაში შეაბიჯებდა. ყველა, ვინც კი ასეთ საქმიანობას იწყებს, განსაკუთრებით კი ბიზნესმენი, მერე პოლიტიკაში მიდის. ან ქვეყნიდან უნდა წახვიდე ან პოლიტიკაში უნდა წახვიდე, სხვა არჩევანი უბრალოდ არ არის“, - განაცხადა ექსპერტმა.

„ჩვენი მთავარი სურვილია, რომ გაიხსნას პოლიტიკური ცხოვრება და შეუერთდნენ სხვადასხვა სუბიექტები“, - განაცხადა პარლამენტის ყოფილმა თავმჯდომარემ, ირაკლი კობახიძემ.

კობახიძის თქმით, მთავარია ის, რომ სუბიექტებმა, რომლებიც პარტიულ ცხოვრებაში შემოვლენ, კონსტრუქციული როლი შეასრულონ სახელმწიფოებრივი განვითარების თვალსაზრისით.

„ვინ ჩაერთოს საპარლამენტო ცხოვრებაში, ეს არის პროპორციული საარჩევნო სისტემის მთავარი სარგებელი. აქედან გამომდინარე, ჩვენი მთავარი სურვილი არის ის, რომ გაიხსნას პოლიტიკური ცხოვრება და შეუერთდნენ სხვადასხვა სუბიექტები. მთავარია, რომ ის სუბიექტები, რომლებიც შემოვლენ პარტიულ ცხოვრებაში, კონსტრუქციული როლი შეასრულონ ჩვენი სახელმწიფოებრივი განვითარების თვალსაზრისით. რაც შეეხება წყალგამყოფს, ეს დღეები იყო ნამდვილად წყალგამყოფი. ზუსტად გამოიკვეთა ამ დღეებში, ვინ ემსახურება მტრის ინტერესებს და ვინ ემსახურება სახელმწიფოს ინტერესებს. ჩვენი პოზიცია მე ვფიქრობ, ამ თემასთან დაკავშირებით უნდა იყოს ძალიან მკაფიო იმისთვის, რომ მტერს არ მიეცეს მტრობის საშუალება“, - განაცხადა კობახიძემ.

შესაძლებელია თუ არა ხაზარაძესთან ერთად გიორგი კვირიკაშვილიც იხილოს საზოგადოებამ და რა შანსი აქვს ხაზარაძეს პოლიტიკაში, კობახიძე ამბობს, რომ კონკრეტულ სუბიექტებზე ვერ ისაუბრებს.

„ბუნებრივია, სხვა სუბიექტებზე კომენტარს ვერ გავაკეთებ. ვისაც უნდა სახელმწიფოსთვის სარგებლის მოტანა, ყველას ვუსურვებ წარმატებებს. ვის უნდა და ვის არ უნდა, ბუნებრივია, ამაზე ჩვენ ვერ ვიმსჯელებთ. ჩვენ ვიცით, ჩვენ რა გვინდა. ჩვენ გვინდა ამ სახელწიფოსთვის სარგებლის მოტანა და ამ დღის წესრიგით ვიმუშავებთ“,  - განაცხადა კობახიძემ.

საპარლამენტო არჩევნების წინ ბევრი პოლიტიკური ძალა გამოჩნდება, აკრეფს პოპულარობას და იქნება ანგარიშგასაწევი როგორც ხელისუფლებისთვის, ასევე ზოგადად, პოლიტიკურ ველზე მოასპარეზეებისთვის, - ასე ეხმაურება საპარლამენტო უმრავლესობის ლიდერი გიორგი ვოლსკი  მამუკა ხაზარაძის გადაწყვეტილებას, დააფუძნოს საზოგადოებრივი მოძრაობა.

„მთავარია, რეალური პოზიცია ჩამოყალიბდეს სახელმწიფოსა და მისი ინტერესების მიმართ, ამის შესახებ გავიგოთ და საფუძვლიან მსჯელობის შესაძლობლობა მოგვეცეს“, - განაცხადა ვოლსკიმ. 

აღნიშნულ კომენტარებს სააგენტო „ინტერპრესნიუსი“ ავრცელებს. 

მამუკა ხაზარაძე საზოგადოებრივ მოძრაობას აფუძნებს. ამის შესახებ მან დღეს Facebook-ზე დაწერა.