კობახიძემ საპარლამენტო არჩევნების ახალი შესაძლო შედეგი დაასახელა

პარლამენტის ყოფილმა თავმჯდომარემ 2020 წლის არჩევნების შედეგების ახალი პროგნოზი გააკეთა. „ვფიქრობ, რეალური სურათი, რაც შეიქმნება საპარლამენტო არჩევნების შემდეგ არის: „ქართული ოცნება” - 60%; „ნაციონალური მოძრაობა” თავისი „ევროპული საქართველოთი” - 20 %; დანარჩენი ოპოზიცია - 20 %. „ქართული ოცნებისთვის” ეს მიღწევადი შედეგია”, - განუცხადა ირაკლი კობახიძემ ჟურნალისტებს.

კობახიძეს ეჭვი არ ეპარება, რომ არჩევნებში გამარჯვებას „ქართული ოცნება“ მოიპოვებს, თუმცა კოალიცის შექმნის აუცილებლობის თეორიულ წინაპირობებზეც ისაუბრა. 

„რაც შეეხება 45%-ს, ეს მარტივი არითმეტიკა იყო და არის მარტივი არითმეტიკა. საუბარია მარტივ კალკულაციაზე, რომელიც გვაძლევს პროგნოზირების საშუალებას, თუ რა შემთხვევაში გახდება შესაძლებელი კოალიციის ფორმირება. ჩვენ ვიცით, როგორია სპექტრი და ჩვენი ვარაუდით, დიდად არ შეიცვლება 2020 წლის საპარლამენტო არჩევნებამდე. არსებული სპექტრის პირობებში, გამარჯვებულმა პარტიამ დაახლოებით 45 % მაინც უნდა აიღოს, რომ შედგეს კოალიცია. გამარჯვებულ პარტიას რაც შეეხება, არავის ეპარება ეჭვი, რომ „ქართული ოცნება“ 2020 წლის არჩევნებში იქნება გამარჯვებული პარტია, თუმცა 45 % არ არის ჩვენი მიზანი და ამოცანა“, - განაცხადა კობახიძემ.

მან ასევე დასძინა, რომ სხვადასხვა არჩევნების დროს პროგნოზებს ხშირად აკეთებდა და არსებითად არასოდეს შემცდარა. 

თუმცა, 14 ოქტომბერს, „პალიტრანიუსის“ გადაცემაში „360 გრადუსი“ კობახიძემ განმეორებითი არჩევნების ჩატარების შესაძლებლობაზე ისაუბრა. კერძოდ, მისი თქმით, თუ „ქართულმა ოცნებამ“ ვერ მოიპოვა მანდატების 45% მაინც, შემდეგ პარლამენტში, სავარაუდოდ, კოალიციის შექმნა ძალიან გართულდება და შეიძლება შეუძლებელიც კი გახდეს.