როგორ აფასებს საერო ხელისუფლება სინოდის სხდომას

სინოდის სხდომა თითქმის ორ საათს გაგრძელდა. პეტრე ცაავას ჭყონდიდის ეპარქიაში მეუფე გრიგოლ კაცია ჩაანაცვლებს, მეუფე იაკობთან დაკავშირებით კი სასულიერო პირებს დამატებითი გადაწყვეტილება არ მიუღიათ, რადგან მან შენდობა ითხოვა.

სინოდის სხდომასთან დაკავშირებით პოლიტიკური განცხადებებიც გაკეთდა. მმართველი გუნდის წევრები ამბობენ, რომ მათთვის მძიმე და წარმოუდგენელია ამ საკითხის პოლიტიკური შეფასება. როგორც ირაკლი კობახიძე ამბობს, საქართველოში ერთმანეთისგან გამიჯნულია ხელისუფლება და ეკლესია, ამიტომ ისინი სირღმეში ვერ შევლენ კონკრეტულ გადაწყვეტილებასთან დაკავშირებით.

"ჩვენი პოზიცია აბსოლუტურად ნათელია. ჩვენ განვაცხადეთ, რომ საფუძველი არ აქვს ამ განცხადებას და აქედან გამომდინარე, კიდევ ერთხელ ხაზს გავუსვამთ იმას, რომ საერო ხელისუფლება და ეკლესია არის გამიჯნული ერთმანეთისგან და ეს პრინციპი მაქსიმალურად მკაცრად უნდა დავიცვათ", - განაცხადა ირაკლი კობახიძემ.

ოპოზიციის თქმით კი უფრო დამაჯერებელი იქნებოდა პეტრე ცაავას განცხადებები, თუ ის თანამდებობიდან გადაყენებამდე გაკეთდებოდა.

"ურთიერთბრალდებები რომლებიც გაისმა, უკეთესი იქნებოდა გაკეთებულიყო თანამდებობის ყოფნის დროს და არა თანამდებობიდან გადაყენების შემდეგ. ამას უფრო მეტი დამაჯერებლობა ექნებოდა", - განაცხადა "ევროპული საქართველოს" ერთ-ერთმა ლიდერმა, გიგი უგულავამ.

"ფაქტი არის ერთი, რომ მისი [პატრიარქის] ტახტისთვის ბრძოლა დაწყებულია... ჩვენ დღევანდელ მოვლენებს სხვადასხვა კუთხიდან უნდა შევხედოთ. ერთი ეს არის ის, რაც ეკლესიაში ხდება და ფაქტია, რომ ეკლესიაში სერიოზული კრიზისია. ეს კრიზისი დააზიანებს ეკლესიას და მის ავტორიტეტს", - განაცხადა "ნაციონალური მოძრაობის" წევრმა, სალომე სამადაშვილმა.

წმინდა სინოდის სხდომიდან გამოსვლის შემდეგ პეტრე ცაავამ განაცხადა, რომ ის წმინდა სინოდმა მღვდელმთავრობიდან გადააყენა. „წმინდა სინოდმა მიიღო უპრეცედენტო გადაწყვეტილება, პირადად პატრიარქმა მღვდემთავრობიდან უსამართლოდ განმაყენა“, -აღნიშნა მეუფე პეტრემ.

მისი თქმით, ამ გადაწყვეტილების მიზეზი ის გახდა, რომ მან ეკლესიაში მამათმავლობა ამხილა. პეტრე ცაავამ ასევე თქვა, რომ "ერს ჰყავს პედარასტიის, მამათმავლობის ცოდვით შეპყრობილი სინოდის თავმჯდომარე".