ექიმი: ვაჟა გაფრინდაშვილი ე.წ. საზღვრის გადაკვეთას არ აღიარებს და ამბობს, რომ ქართულ მიწაზე იმყოფება

ექიმი დავით ღვინიაშვილის ინფორმაციით, ოკუპანტები და ოსი სეპარატისტები ექიმ ვაჟა გაფრინდაშვილისაგან ერთადერთ რამეს ითხოვენ: აღიაროს საზღვრის გადაკვეთა, რაზეც ის კატეგორიულ უარს აცხადებს. ამის შესახებ ღვინიაშვილი Facebook-ზე წერს.

„გუშინ „გორმედის“ სამედიცინო ქსელისა და გორის ტრავმატოლოგ-ორთოპედთა სახელით გავავრცელეთ განცხადება, რომელშიც ჩვენი კოლეგის, ბატონი ვაჟა გაფრინდაშვილის უკანონო დაკავებასთან დაკავშირებით პროტესტი გამოვთქვით. გუშინვე, პროფესიული საქმიანობიდან გამომდინარე, მოგვიწია ცხინვალის იზოლატორიდან გათავისუფლებულ ადამიანებთან გასაუბრება. მათი თქმით, ოკუპანტები და ოსი სეპარატისტები ვაჟა გაფრინდაშვილისაგან ერთადერთ რამეს ითხოვენ: აღიაროს საზღვრის გადაკვეთა, რაზეც ის კატეგორიულ უარს აცხადებს და ამბობს, რომ იმყოფება საქართველოში, ქართულ მიწაზე. ვერ გაჭრა თურმე ვერც ქართველ თანასაკნელთა ხვეწნამ და შეგონებამ.

შორს წასვლა საჭირო აღარ არის, აგერ უახლოესი ისტორიის გმირული მაგალითები გვაქვს თვალწინ, რომელი ერთი ჩამოვთვალოთ - გურამ გაბისკირია, გიორგი ანწუხელიძე, არჩილ ტატუნაშვილი...

„არასოდეს ცხოვრებაში!!!“ - სოხუმის მერის მიერ წარმოთქმული ეს სიტყვები ყველა ქართველს უნდა ახსოვდეს, ყველა ქართველს და ყველა ხელისუფალს, ყველა პოლიტიკოსსა და საზოგადო მოღვაწეს. აღარ სცალიათ, სამწუხაროდ, რუსთაველის გამზირზე აქვთ ერთმანეთთან საქმეები გასარკვევი, ე.წ. დროებითი მთავრობის ჩამოყალიბებით არიან დაკავებულები. გახარებულები არიან, ცქმუტავენ, როლში შევიდნენ აშკარად... ქაცარავა და თავისი რაზმი, აგრეთვე ის შარვალჩახდილებიც აღარსად ჩანან. ადვილად იშიფრება ხოლმე გულწრფელი ყალბისაგან...

ასეა თუ ისე, ბატონი ვაჟა კვლავ ოკუპანტების ტყვეობაში იმყოფება და არ ჩანს, სამწუხაროდ, ქმედითი ნაბიჯები და პროტესტი, რომელიც ღიად უნდა გამოხატოს ხელისუფლებამ. აქტიურად უნდა იყვნენ ჩართულები საერთაშორისო ორგანიზაციები და დიპლომატიური კორპუსის წარმომადგენლები. საქმე გვაქვს ძალიან ცნობილი, კარგი ექიმის, ღირსეული ქართველის უკანონო ტყვეობასთან. არ უნდა გვქონდეს მხოლოდ ოკუპანტებისა და სეპარატისტების „კეთილგონიერების“ იმედი. არ იციან, რომ ექიმი ომის დროსაც ექიმია (ამის მაგალითად 2008 წლის ომის დროს დაბომბილი გორის ჰოსპიტალი და დაღუპული გმირი ექიმი, გიორგი აბრამიშვილიც კმარა).

ძვირფასო კოლეგებო, მეგობრებო, მოგიწოდებთ შევიკრიბოთ, გავერთიანდეთ და ერთად გამოვხატოთ მრავალრიცხოვანი პროტესტი თუნდაც ე.წ. საოკუპაციო ზოლთან ახლოს, რომელიც გაშუქდება როგორც ჩვენი ქვეყნის, აგრეთვე საერთაშორისო მედიასაშუალებებითაც“, - წერს ღვინიაშვილი.

მანამდე ცნობილი გახდა, რომ პრეზიდენტმა ექიმ ვაჟა გაფრინდაშვილის დაკავების გამო საერთაშორისო ორგანიზაციებს მიმართა. განცხადება გააკეთეს საგარეო საქმეთა და ჯანდაცვის სამინისტროებში და სახალხო დამცველის აპარატშიც.

15 ნოემბერს ექიმ ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის დარღვევას ედავებიან.