კალაძე: პოლიტიკა დესტრუქციული ძალებისაგან უნდა გათავისუფლდეს

გუბაზ სანიკიძის განცხადებას პოლიციის შესახებ  „ქართული ოცნების“ პოლიტსაბჭოს წევრები გამოეხმაურნენ. თბილისის მერმა, კახა კალაძემ განაცხადა, რომ პოლიტიკა დესტრუქციული ძალებისაგან უნდა გათავისუფლდეს. პარლამენტის იურიდიული კომიტეტის თავმჯდომარის, ანრი ოხანაშვილის განცხადებით კი ეს არის თანმიმდევრული ქმედება, რომლის რეალური მიზანია ხელისუფლების დამხობა. 

„ეს არის ბანდა ადამიანების, ეს არ არის პირველი შემთხვევა, ჩვენ ასეთ განცხადებებს უკვე წლებია ვისმენთ. კიდევ ერთხელ, ყველას მინდა, მოვუწოდო სიმშვიდისკენ, არავის მიეცემა ქვეყანაში არეულობის შემოტანის საშუალება, არავის მიეცემა საშუალება ახალგაზრდების დაპირისპირების. კიდევ ერთხელ ვიმეორებ, ყველაფერი უნდა გავაკეთოთ, რათა პოლიტიკა გავათავისუფლოთ დესტრუქციული ძალებისგან. ახალი პოლიტიკოსები შემოვიდნენ, ახალი პოლიტიკური პარტიები გაჩნდება,  რომლებსაც ექნება ნათელი ხედვა ქვეყნის განვითარებაზე, ჩვენი ქვეყნის მომავალზე“, – განაცხადა კახა კალაძემ.

პარლამენტის იურიდიულ საკითხთა კომიტეტის თავმჯდომარე, ანრი ოხანაშვილი კი აცხადებს, რომ  ამ განცხადებებით, სახელმწიფო უწყებებზე იერიშის მიტანა ხდება. 

„ეს არის თანმიმდევრული მოქმედება გამოხატული განცხადებებსა და მოწოდებებში, სახელმწიფო უწყებებზე იერიშის მიტანისკენ, ხელისუფლების დამხობისკენ. ყველა მათ ქმედებაში იკვეთება რეალური მიზანი - ხელისუფლების დამხობა. დღესაც, მათი ერთადერთი მიზანია სახელმწფოს წინააღმდეგ წასვლა. ქართულ სახელმწიფოს ებრძვიან. ებრძვიან ქართველ ხალხს, სახელმწიფოს და ეკლესიას“, - განაცხადა ანრი ოხანაშვილმა.  

გუბაზ სანიკიძის განცხადებას პოლიციის შესახებ სახალხო დამცველი ნინო ლომჯარიაც გამოეხმაურა, მისი თქმით, ყველა სიფრთხილით უნდა მოეკიდოს თავის განცხადებას, იმ შემთხვევაში, თუ მოწოდება შეიცავს რეალურ და მყისიერ საფრთხეს:

„ძალადობისკენ მოწოდება უნდა შეაფასოს სამართალდამცველმა ორგანოებმა და მოახდინონ რეაგირება. ესე აპრიორში რაღაცის თქმა შეუძლებელია. შესწავლილი უნდა იყოს, ეს არის გამოხატვის თავისუფლება თუ რეალურად სახიფათო ტიპის განცხადება. თითოეულ შემთხვევაში უნდა მოხდეს ამისი შეფასება“, - განაცხადა ლომჯარიამ. 

გუბაზ სანიკიძემ სამართალდამცველებს ტელეკომპანია „კავკასიის“ ეთერში მოუწოდა, რომ „ხალხის მხარეს დადგნენ“, „წინააღმდეგ შემთხვევაში,  ნახევარი მილიონი ქართველი გამოვა ორლულიანი თოფებით და თქვენზე დაიწყებენ ნადირობას“.