ზალკალიანი: ყველა ძალისხმევას მივმართავთ რომ ვაჟა გაფრინდაშვილი რაც შეიძლება სწრაფად დაბრუნდეს საკუთარ ოჯახში

საქართველოს საგარეო საქმეთა მინისტრ დავით ზალკალიანის განცხადებით, ვაჟა გაფრინდაშვილისთვის პატიმრობის შეფარდება ადასტურებს, რომ ეს იყო შეგნებული პროვოკაცია. 

მინისტრის თქმით, ყველა რესურსი მაქსიმალურად იყო ამოქმედებული. 

„ყველა საერთაშორისო სტრუქტურა, ყველა საერთაშორისო ორგანიზაცია ჩავრთეთ. ეს კიდევ ერთხელ არის დასტური, რომ მისი დაკავება იყო შეგნებული პროვოკაცია. აუცილებლად ჟენევის თანათავმჯდომარეებთან გვექნება მყისიერი რეაგირება.

იმ სამოქმედო გეგმას, რომელიც გვქონდა ამ ცუდს სცენართან მიმართებაში, აუცილებლად ავამოქმედებთ. ყველა ძალისხმევას მივმართავთ, რომ ბატონი ვაჟა, რაც შეიძლება სწრაფად დაბრუნდეს საკუთარ ოჯახში. ეს არის კატეგორიულად მიუღებელი, დაუშვებელი, საერთაშორისო ნორმების დარღვევა და მაქსიმალურად იქნება ამოქმედებული ყველა არსებული თუ არარსებული მექანიზმი“, - განაცხადა ზალკალიანმა.

„დაუყოვნებლივ მექნება სატელეფონო ზარები ჟენევის თანათავმჯდომარეებთან. ასევე განხორციელდება კომუნიკაცია ყველა საერთაშორისო ორგანიზაციასთან, ეუთოს მოქმედ თავმჯდომარესთან ასევე ევროკავშირსა და გაეროსთან, რომ მაქსიმალურად იქნას ამოქმედებული ყველა მექანიზმი. ეს არის კატეგორიულად მიუღებელი და კიდევ ერთხელ ადასტურებს, რომ მისი უკანონო დაკავება იყო გამიზნული პროვოკაცია, მაგრამ ჩვენ ამას ასე არ დავტოვებთ.

ყველა შესაძლო, მათ შორის სამართლებრივ განზომილებაზე ვფიქრობდით, რაც შეიძლებოდა. ოჯახთან ვართ მუდმივ კომუნიკაციაში და ის სურვილები, რაც მათგან მოდიოდა ჩვენ მყისიერად შემხვედრ ნაბიჯებს ვდგამდით. ოკუპანტ ძალასთან გვაქვს საქმე, რომლისთვისაც არანაირი საერთაშორისო ნორმები არ არსებობს“, - განუცხადა ჟურნალისტებს ზალკალიანმა.

ოკუპანტების მიერ გატაცებულ ექიმ ვაჟა გაფრინდაშვილს ცხინვალის ე.წ. სასამართლომ 1 წლით და 9 თვით თავისუფლების აღკვეთა მიუსაჯა. 

13 დეკემბერს ცხინვალის ე.წ. სასამართლომ ვაჟა გაფრინდაშვილი პატიმრობაში დატოვა. ვაჟა გაფრინდაშვილს ოკუპანტებმა ორთვიანი წინასწარი პატიმრობა 15 ნოემბერს შეუფარდეს. მას ე.წ. საზღვრის უკანონო გადაკვეთას ედავებოდნენ. 

15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან. 18 ნოემბერს „თეთრი ხალათების აქცია“ საქართველოს რამდენიმე ქალაქში გაიმართა. 17 დეკემბერს ექიმის მეუღლემ განაცხადა, რომ ცხინვალის რეჟიმის მიერ უკანონოდ დაკავებული ექიმის გათავისუფლების მიზნით პრემიერმინისტრის ადმინისტრაციამ საკოორდინაციო საბჭო შექმნა.

ვაჟა გაფრინდაშვილის საკითხი ჟენევის საერთაშორისო მოლაპარაკებების 50-ე რაუნდის მთავარი თემა იყო. 

მანამდე ეს საკითხი უცხოელ პარტნიორებთან გამართული შეხვედრების დროს ერთ-ერთი მთავარი თემა იყო. საგარეო საქმეთა მინისტრმა დავით ზალკალიანმა 6 დეკემბერს, ეუთოს მოქმედ თავმჯდომარესთან მიროსლავ ლაიჩაკთან შეხვედრის შემდეგ განაცხადა, რომ არსებობს პოზიტიური ნიშნები, რომ ექიმ ვაჟა გაფრინდაშვილს მალე გაათავისუფლებდნენ. 

ამავე დღეს ეუთოში საქართველოს მეგობართა ჯგუფმა ვაჟა გაფრინდაშვილის სასწრაფოდ გათავისუფლება გავრცელებული განცხადებით მოითხოვა. გარდა ამისა, ექიმ ვაჟა გაფრინდაშვილის გატაცების საკითხი მინისტრმა ქეთევან ციხელაშვილმა ბრიუსელში გამართულ შეხვედრებზე განიხილა.