ზაზა ბიბილაშვილმა, მარიამ გერსამიამ და ნინო კალანდაძემ „ნაციონალური მოძრაობა” დატოვეს

ზაზა ბიბილაშვილმა, მარიამ გერსამიამ და ნინო კალანდაძემ „ნაციონალური მოძრაობა” დატოვეს. როგორც imedi.ge-ს „ნაციონალურ მოძრაობაში“ განუცხადეს, თითქმის ორი წელია ისინი პარტიულ საქმიანობაში აღარ მონაწილეობენ და შესაბამისად, მათ მიერ ამ გადაწყვეტილების მიღება მოულოდნელი არ იყო.

რაც შეეხება საკითხს, თუ რატომ გადაწყვიტეს მათ პარტიიდან წასვლა, ლევან ბეჟაშვილი აცხადებს, რომ მათ საქმიანობა არასამთავრობო სექტორში გადაწყვიტეს და დააფუძნეს „ილია ჭავჭავაძის საზოგადოება“.

"ეს განცხადება, მოულოდნელი არ იყო, ამიტომ რაღაც სკანდალურს და ჩვენთვის ახალს ამ განცხადებიდან ვერ ვიგებთ“, - განაცხადა ლევან ბეჟაშვილმა და imedi.ge-ს უპასუხა, რომ მათ ჯერ არ მიუმართავთ ოფიციალური განცხადებით და პარტიამ მათი ამ გადაწყვეტილების შესახებ მედიასაშუალებებით შეიტყო. 

„ფორმალური გადაწყვეტილება მიიღეს მათ. ამ ორი-სამი წლის განმავლობაში თვითმმართველობის არჩევნები ჩატარდა, შემდეგ საპრეზიდენტო არჩევნები, ზუგდიდის არჩევნები გვქონდა, შემდეგ მერის. მათ არცერთ საარჩევნო კამპანიაში და სხვა პარტიულ საქმიანობაში მონაწილეობა არ მიუღიათ იმიტომ, რომ მათ არჩევანი გააკეთეს სწორედ არასამთავრობო სექტორში შესვლაზე, დააფუძნეს არასამთავრობო ორგანიზაცია და ამ მიმართულებით განაგრძეს მუშაობა. ჩვენ ვიცოდით ამის შესახებ, არანაირი პრინციპული უთანხმოება - ორივე მხარე ვხედავთ და ვიცით, რომ მთავარი პრობლემა ამ ქვეყანაში არის „ქართული ოცნება“ და ბიძინა ივანიშვილი“, - განაცხადა ლევან ბეჟაშვილმა. 

ზაზა ბიბილაშვილმა Facebook-ზე „ჭავჭავაძის ცენტრის“ წარმომადგენლების განცხადება გაავრცელა, სადაც წერია, რომ ისინი თითქმის ორი წელია სრულად ჩამოშორდნენ პარტიულ საქმიანობას. 

„საზოგადოებისთვის ცნობილია, რომ უკვე თითქმის 2 წელია, სრულად ჩამოვშორდით პარტიულ საქმიანობას და, ჩვენს კოლეგებთან ერთად, მთლიანად ფოკუსირებული ვართ „ჭავჭავაძის ცენტრის“ განვითარებაზე - ცენტრისა, რომლის გრძელვადიანი მიზანია, ხელი შეუწყოს ქართული საზოგადოების ფუნდამენტურ ტრანსფორმაციას სამოქალაქო განათლების, კრიტიკული აზროვნებისა და ინდივიდუალური პასუხისმგებლობის გავრცელების გზით. ამ ვითარებამ, რომელიც ორმხრივი არჩევანის შედეგი იყო, არაერთი კითხვა გააჩინა. შემდგომი გაუგებრობების თავიდან ასაცილებლად, მიგვაჩნია, რომ აუცილებელია ფაქტობრივი მდგომარეობა შესაბამისობაში მოვიდეს ფორმალურთან. ამიტომ, დღეიდან ფორმალურად ვწყვეტთ პარტიის წევრობას. წარმატებას ვუსურვებთ დამოუკიდებელ, პროდასავლურ ოპოზიციას და სამოქალაქო აქტივისტებს. ამასთან, ხაზგასმით ვაცხადებთ, რომ არ ვაპირებთ არც ერთ სხვა პოლიტიკურ გაერთიანებასთან ასოცირებას ან 2020 წლის არჩევნებში მონაწილეობას. ჩვენი მიზანია ჩვენი წვლილი შევიტანოთ თვისებრივად ახალი პოლიტიკური რეალობის შექმნაში, რათა ახლაც და ხელისუფლების ცვლილების შემდეგაც, საქართველოში იყოს მეტი რაციონალური, კრიტიკულად მოაზროვნე, ლიბერალური ღირებულებების ორგანულად მატარებელი, ეკონომიკურად დამოუკიდებელი აქტიური მოქალაქე, რომელიც თამაშის წესებს დაუდგენს პოლიტიკურ კლასს და რომელთაც გადამწყვეტი გავლენა ექნებათ საკუთარ მომავალზე“ - ამაზე ხელს აწერენ ზაზა ბიბილაშვილი, მარიამ გერსამია და ნინო კალანდაძე.