ინვესტორი მერიას ვაკის პარკში სასტუმროს ნაცვლად რესტორნის აღდგენას სთავაზობს

ინვესტორი თბილისის მერიას ახალ ვარიანტს სთავაზობს და მზად არის, უარი თქვას სასტუმროს მშენებლობაზე, სანაცვლოდ კი ვალდებულებას იღებს, აღადგინოს 1958 წელს აშენებული რესტორანი "ბუდაპეშტი" ისტორიულად არსებული მოცულობისა და ფასადის შესაბამისად. 

დღეს გამართულ პრესკონფერენციაზე სასტუმრო "ბუდაპეშტის“ წარმომადგენელმა, გოგა ზაქაიძემ განაცხადა, რომ  მიუხედავად სასამართლოს დადებითი გადაწყვეტილებისა და სრული კანონიერი უფლებისა, ეს ვარიანტი მიიღეს იქიდან გამომდინარე, რომ მერია ვაკის პარკის რეაბილიტაციას გეგმავს.

ინვესტორის განცხადებით, რესტორან "ბუდაპეშტის" მშენებლობისას არ დაზიანდება არც ერთი ნარგავი, დამატებით გამწვანდება და კეთილმოეწყობა მიმდებარე ტერიტორია. განხორციელდება მასშტაბური ინვესტიცია და არსებული მდგომარეობის ნაცვლად, ტერიტორიას თავისი პირვანდელი სახე დაუბრუნდება. ასევე ტერიტორიაზე მოეწყობა ველო პარკი, სადაც პარკის დამსვენებლები სრულიად უსასყიდლოდ შეძლებენ ამ სერვისით სარგებლობას.

სასტუმრო "ბუდაპეშტის" წამომადგენლის, გოგა ზაქაიძის განცხადებით, ინვესტორის მიერ მიღებული ეს გადაწყვეტილება შესაძლებლობას მისცემს თბილისის მუნიციპალიტეტს, დაზოგოს ბიუჯეტიდან 6 მილიონი დოლარის საკომპენსაციო თანხა და ასევე არ შეილახება მესაკუთრის სამართლებრივი უფლებები. 

„მინდა, გაგაცნოთ ჩვენი ახალი ინიციატივა, რომელიც გვინდა, შევთავაზოთ თბილისელებს და თბილისის მერიას. მიუხედავად სასმართლოს დადებითი გადაწყვეტილებისა და ყველანაირი კანონიერი უფლებისა, ჩვენ ვთანხმდებით კომპრომისულ ვარიანტს და მზად ვართ, უარი ვთქვათ ვაკის პარკის მიმდებარე ტერიტორიაზე სასტუმროს მშენებლობაზე. 

მოგეხსენებათ, თბილისის მუნიციპალიტეტი იწყებს ვაკის პარკის და ისტორიული კასკადის რეაბილიტაციას. სწორედ ამ მასშტაბური პროექტიდან გამომდინარე, ინვესტორი მზად არის, სასტუმროს მშენებლობის ნაცვლად აღადგინოს ამ ადგილას რესტორან "ბუდაპეშტის" ისტორიული შენობა, რომელიც აშენდა 1958 წელს, ათწლეულების განმავლობაში წარმოადგენდა პარკის განუყოფელ ნაწილს და იყო პარკის სტუმრების ერთ-ერთი საყვარელი და კოლორიტული ადგილი. 

ჩვენ მზად ვართ, დავთანხმდეთ მერიის მხრიდან შემოთავაზებულ თავდაპირველ წინადადებას და დავუბრუნოთ რესტორანს თავისი პირვანდელი სახე. ისტორიულად არსებული სიმაღლისა და ფასადის შესაბამისად. აქვე მინდა ხაზგასმით ავღნიშნო, რომ აღდგენითი სამუშაოების დროს არათუ დაზიანდება არც ერთი ნარგავი, არამედ დამატებით განხორციელდება ტერიტორიის გამწვანება. ინვესტორი საჯაროდ იღებს ვალდებულებას, რომ მოახდენს არსებული ტერიტორიის უმოკლეს დროში კეთილმოწყობას და მომავალში მის მოვლა-პატრონობას. თქვენ ხედავთ დღესდღეობით რა ვითარებაა ადგილზე და ვფიქრობთ, რომ რესტორან ბუდაპეშტის აღდგენა სრულ შესაბამისობაში მოვა ვაკის პარკის რეაბილიტაციასთან.

ვფიქრობთ, რომ ეს არის საუკეთესო ვარიანტი იმისათვის, რომ დღეს არსებული სამშენებლო თხრილის ნაცვლად, პარკს და ამ ადგილს დაუბრუნდეს პირვანდელი სახე.

მინდა, წარმოგიდგინოთ რესტორან "ბუდაპეშტის" ისტორიული შენობის პროექტი, სადაც შენარჩუნებულია პირვანდელი სახე.
აქვე დავამატებთ, რომ ამ პროექტის განხორციელების შემდეგ ინვესტორი ასევე იღებს ვალდებულებას, ადგილზე მოაწყოს ველო პარკი და პარკის სტუმრები შეძლებენ, სრულიად უფასოდ ისარგებლონ ამ სერვისით“, - განაცხადა გოგა ზაქაიძემ.