ვანო მერაბიშვილი აცხადებს, რომ ხელისუფლების შეცვლის პროცესის მთავარი მონაწილე იქნება, თუმცა პოლიტიკურ თანამდებობაზე დაბრუნებას აღარ აპირებს

მე ჯერ არ მაქვს გადაწყვეტილი, რომელ პოლიტიკურ პარტიაში გავერთიანები, - ამის შესახებ საპატიმროდან დღეს გათავისუფლებულმა ვანო მერაბიშვილმა „მთავარის“ ეთერში განაცხადა. თუმცა ყოფილი შინაგან საქმეთა მინისტრი ადასტურებს, რომ აქტიურ პოლიტიკურ საქმიანობას აპირებს. 

„მე როცა ციხეში მოვხვდი, „ნაციონალური მოძრაობა“ და „ევროპული საქართველო“ იყო ერთიანი და მე დღეს პრაქტიკულად იმავე განცდით ვარ. ჩემი ბოლო მეხსიერება არის ის, რომ ჩვენ ყველანი ერთად ვიყავით. რა თქმა უნდა კარგი იქნებოდა, რომ პარტიის გაყოფა არ მომხდარიყო, თუმცა მე არ ვარ ამის მსჯული. ორივე პარტიაში არიან ჩემი მეგობრები და მე მჭირდება გარკვეული დრო, რომ ჩამოვყალიბდე და გავერკვე, რა აქვთ მათ საერთო და განსხვავებული. თუმცა დღეს მთელი ოპოზიცია და საზოგადოება შეთანხმებულია იმაზე, რომ ეს ხელისუფლება უნდა შეიცვალოს“, - განაცხადა ვანო მერაბიშვილმა.

თავის როლზე საუბრისას, ვანო მერაბიშვილმა თქვა, რომ ყველა ამ პროცესში ის ერთ-ერთი მთავარი მონაწილე იქნება. „მე ვიქნები ერთ-ერთი მიუკერძოებელი და მე არ მექნება პირადი ინტერესები. როცა 2012 წელს პრემიერმინისტრი გავხდი, ეს ჩემი პირადი სურვილი არ ყოფილა, შეიკრიბნენ ჩემი მეგობრები და გადაწყიტეს, რომ რახან მაშინ ყველაზე მაღალი რეიტინგი მქონდა, საჭირო იყო ჩემი კანდიდატურის დაყენება. მე ვიყავი წინააღმდეგი და შემიძლია გითხრათ, რომ პრემიერმინისტრობა არ მომეწონა“, - განაცხადა მერაბიშვილმა.

მისი თქმით, კონკრეტული საქმეების კეთება უყვარს. „მე მიყვარს კონკრეტული რეფორმის ჩატარება, უშუალოდ მონაწილოება პროცესებში. მე მომწონდა, როცა ვიყავი შს მინისტრი, უშიშროების საბჭოს მდივანი, როცა ვაკეთებდი პოლიციის რეფორმას, ვებრძოდით კრიმინალს", - განაცხადა მერაბიშვილმა.

მისივე თქმით, მას შეუძლებლად მიაჩნია, რომ ყოფილი პრემიერ-მინისტრი დაბრუნდეს მინისტრის პოსტზე. „შეუძლებლად მიმაჩნია, ყოფილი პრემიერ-მინისტრი დაბრუნდეს მინისტრის პოსტზე, მით უმეტეს, უფრო დაბალ თანამდებობაზე. რაც შეეხება საქმის კეთებას, იმდენი საშუალებაა საქმის კეთების. მე ვიქნები აქტიური პოლიტიკაში არა მარტო ამ ხელისუფლების არჩევნების გზით ჩამოცილების მიმართულებით, არამედ მერეც“, - განაცხადა მერაბიშვილმა.

ვანო მერაბიშვილმა სასჯელაღსრულების დაწესებულება 20 თებერვალს დატოვა.

შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.