ელმან ნასიროვის ბრალდებებს ქართველი დეპუტატები და სუსი გამოეხმაურნენ

დღეს, აზერბაიჯანელმა დეპუტატმა, ელმან ნასიროვმა განაცხადა, რომ ჟურნალისტი აფგან მუხტარლი საქართველოსა და აზერბაიჯანის სპეცსამსახურების თანამშრომლობის შედეგად დააპატიმრეს. ნასიროვს ქართველმა დეპუტატებმა უპასუხეს და ბრალდებებზე მტკიცებულებების წარმოდგენა მოსთხოვეს. ბრალდებას საქართველოს უსაფრთხოების სამსახურიც გამოეხმაურა. 

"ანალიზი აჩვენებს, რომ აფგან მუხტარლი დიდი ქსელის ერთი ნაწილია და მხოლოდ ის რომ ყოფილიყო პრობლემა, ბუნებრივია, მისი დაპატიმრება საჭირო არ იქნებოდა", - განაცხადა რადიო თავისუფლების აზერბაიჯანულ ბიუროსთან ინტერვიუში აზერბაიჯანის პარლამენტის ადამიანის უფლებათა კომიტეტის წევრმა პარლამენტარმა ელმან ნასიროვმა.

საქართველოს პარლამენტის საპროცედურო საკითხთა კომიტეტის თავმჯდომარის, გიორგი კახიანის თქმით, აზერბაიჯანელი დეპუტატის შეფასება უსაფუძვლოა. კახიანის კომენტარს 1tv.ge ავრცელებს.

„ამ ეტაპზე, ამ საქმესთან დაკავშირებით რაც ცნობილია, ეს აზერბაიჯანური მხარის განმარტებაა, რომ ჟურნალისტის დაკავება საზღვრის კვეთის პროცესში მოხდა. ჩვენი მხრიდან გამოძიება მიმდინარეობს, რათა დადგინდეს, თუ რა  ვითარებაში აღმოჩნა აზერბაიჯანელი ჟურნალისტის საქართველოდან აზერბაიჯანში. ამ პროცესში ქართული სპეცსამსახურების მონაწილეობას კატეგორიულად გამოვრიცხავ. გამცხადებელს თუ რაიმე მტკიცებულება აქვს, უფრო მეტი უნდა ეთქვა. ეს უპასუხისმგებლო განცხადებაა“, - აღნიშნავს კახიანი. 

საპარლამენტო უმრავლესობის წევრი ანრი ოხანაშვილი აზერბაიჯანელი დეპუტატის განცხადებას სკანდალურს უწოდებს. მისი თქმით, ქართველი სპეცსამსახურები ადამიანის თავისუფლების აღკვეთაში ჩართული ვერ იქნებოდნენ. 

„თუ აზერბაიჯანელ კოლეგას რაიმე მტკიცებულება აქვს, წარმოადგინოს. წინააღმდეგ შემთხვევაში, ეს ძალიან დიდი პროვოკაცია იქნება და არასტანდარტული განცხადებაა", - განაცხადა ოხანაშვილმა. 

"აზერბაიჯანელი დეპუტატის ელმან ნასიროვის განცხადება იმის თაობაზე, რომ ჟურნალისტ აფგან მუხტარლის დაკავება იყო აზერბაიჯანისა და საქართველოს სპეცსამსახურების ერთობლივი მუშაობის შედეგი, სიმართლეს არ შეესაბამება. სახელმწიფო უსაფრთხოების სამსახური დეპუტატის მიერ გავრცელებულ ინფორმაციას და რაიმე კავშირს აფგან მუხტარლის საქმესთან კატეგორიულად უარყოფს. აზერბაიჯანელი ჟურნალისტის, აფგან მუხტარლის საქმესთან დაკავშირებით, საქართველოს შინაგან საქმეთა სამინისტრო გამოძიებას აწარმოებს საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს.", - ნათქვამია სუსის განცხადებაში.

აზერბაიჯანელი ჟურნალისტის აფგან მუხტარლის ოჯახმა 29 მაისს განაცხადა, რომ მუხტარლი გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. 

აზერბაიჯანის პროკურატურის განცხადებით, აფგან მუხტარლიმ საზღვარი გამშვები პუნქტის გვერდის ავლით, პირადობის მოწმობის გარეშე გადაკვეთა.

ადვოკატის ინფორმაციით, მუხტარლის ბრალად წაუყენეს საზღვრის უკანონოდ გადაკვეთა, კონტრაბანდა, სამართალდამცავებისათვის წინააღმდეგობის გაწევა (სისხლის სამართლის კოდექსის 318.1, 206.1 და 315.2 მუხლები). მას სასამართლომ სამთვიანი წინასწარი პატიმრობა შეუფარდა.