არასამთავრობოები სოფელ ბერშუეთში ე.წ სასაზღვრო ბანერის აღმართვაზე განცხადებას ავრცელებენ

არასამთავრობო ორგანიზაციები რუსეთის საოკუპაციო ძალების მიერ გორის რაიონის სოფელ ბერშუეთის მიმართულებით არსებულ საოკუპაციო ხაზზე ე.წ სასაზღვრო ბანერის აღმართვის ფაქტზე განცხადებას ავრცელებენ. 

განცხადების ავტორები ფიქრობენ, რომ რუსეთის მიზანს წარმოადგენს საქართველოს ოკუპირებული რეგიონების სრული ანექსია და საქართველოს საგარეო პოლიტიკური კურსის ცვლილება. ისინი საქართველოს ხელისუფლებას მიმართავენ, საერთაშორისო თანამეგობრობის, როგორც ორმხრივ, ასევე მრავალმხრივ ფორმატებში, პოზიციის მობილიზაციასთან ერთად, დაუყოვნებლივ გაიმართოს შეხვედრა უშიშროების საბჭოს ან/და უსაფრთხოებისა და კრიზისების მართვის საბჭოს ფორმატის ფარგლებში.

მათივე მოსაზრებით, პრინციპულად მნიშვნელოვანია, ფუნდამენტურად გადაიხედოს რუსეთთან ურთიერთობის სტრატეგია.

“აღნიშნული ვითარება წარმოადგენს უაღრესად სერიოზულ გამოწვევას ჩვენი ქვეყნის ეროვნული უსაფრთხოებისა და საქართველო-რუსეთს შორის კონფლიქტის მშვიდობიანი დარეგულირებისთვის. რუსეთი აგრძელებს ძირითადი საერთაშორისო ნორმების და 2008 წლის 15 აგვისტოს შეთანხმების უხეშ დარღვევას. აშკარაა, რომ რუსეთის მიზანს წარმოადგენს საქართველოს ოკუპირებული რეგიონების სრული ანექსია და საქართველოს საგარეო პოლიტიკური კურსის ცვლილება.

ჩვენ მივმართავთ საქართველოს ხელისუფლებას, საერთაშორისო თანამეგობრობის, როგორც ორმხრივ, ასევე მრავალმხრივ ფორმატებში, პოზიციის მობილიზაციასთან ერთად, დაუყოვნებლივ გაიმართოს შეხვედრა უშიშროების საბჭოს ან/და უსაფრთხოებისა და კრიზისების მართვის საბჭოს ფორმატის ფარგლებში, რომელზეც განხილული იქნება საქართველოსა და მისი მოქალაქეების წინაშე დღეს არსებული მყისიერი საფრთხეები, ასევე ჩვენი ქვეყნის უსაფრთხოების უაღრესად სერიოზული გამოწვევები, რაც გამოიხატება ე.წ. ბორდერიზაციის, მცოცავ ოკუპაციასა და მოსალოდნელ ანექსიაში."- ნათქვამია განცხადებაში. 

არასამტავრობო სექტორის აზრით, პრინციპულად მნიშვნელოვანია, რომ ფუნდამენტურად გადაიხედოს რუსეთთან ურთიერთობის სტრატეგია.

ამ განცხადებას ხელს აწერენ არასამთავრობო ორგანიზაციები: ”საქართველოს რეფორმების ასოციაცია” (GRASS); ”მედიის განვითარების ფონდი” (MDF); ”კვლევითი ჟურნალისტიკისა და ადვოკატირების ცენტრი”; ”საქართველოს დემოკრატიული ინიციატივა” (GDI); ”საქართველოს სტრატეგიისა და საერთაშორისო ურთიერთობების კვლევის ფონდი” (GFSIS); ”საქართველოს ატლანტიკური საბჭო”; ”საერთაშორისო გამჭვირვალობა – საქართველო” (TI).

რუსმა ოკუპანტებმა გორის მუნიციპალიტეტის სოფელ ბერშუეთში ე. წ. საზღვარი გადმოწიეს 4 ივლისს გადმოწიეს. ადგილობრივების თქმით, ე. წ. საზღვრის აღმნიშვნელი ბანერი გუშინ დადგეს. მათ დაახლოებით 10 ჰექტარი მიწის ნაკვეთი დაკარგეს.