ნიკა გვარამია ფინანსთა მინისტრს პასუხობს

სამაუწყებლო კომპანია რუსთავი 2-ის გენერალური დირექტორი ნიკა გვარამია ფინანსთა მინისტრს დიმიტრი ქუმსიშვილს პასუხობს. გვარამიას განცხადებით, ქუმსიშვილმა დღეს საქართველოს კანონმდებლობა უხეშად დაარღვია და გათქვა ის ინფორმაცია, რომლის დაცვა მას ევალება."ეს არის კონფიდენციალური ინფორმაცია, რომელიც საგადასახადო ვალდებულებას ეხება. ეს არის ძალიან ცუდი სიგნალი არა მარტო შიდა სამეწარმეო წრეებისთვის, არამედ ყველა მსხვილი ინვესტორებისთვის, რომ ცნობილი ხდება ის ფინანსური ვალდებულება, რომელიც კომპანიას აქვს,"- განაცხადა გვარამიამ. ტელეკომპანიის გენერალურმა დირექტორმა ფინანსთა მინისტრი ტყუილში დაადანაშაულა. მისი თქმით, არანაირი მოლაპარაკება სახელმწიფოსთან ტელეკომპანიის ფინანსური დავალიანების გადახდის გრაფიკთან დაკავშირებით, არ მიმდინარეობს.  

ამ კონტექსტში გვარამიამ ფინანსთა მინისტრისგან ბიძინა ივანიშვილის ფინანსური ანგარიშების და ვალდებულებების გასაჯაროებაც მოითხოვა. 

რუსთავი 2-ის გენერალურმა დირექტორმა ეს ფაქტი ტელეკომპანია "იმედის" და სახელმწიფოს თანამშრომლობას დაუკავშირა, გვარამია ამბობს, რომ მთავრობა "იმედს" სასათბურე პირობებს უქმნის.   

მისი თქმით, "რუსთავი 2" უკვე 2 წელია უმძიმესი ფინანსური წნეხის ქვეშაა. მას არ შეუძლია არცერთ ბანკთან ურთიერთობა, ვერ იხდის თანამშრომლების ხელფასებს სრულყოფილად. ნიკა გვარამიამ ეს სახელმწიფოს მიერ ტელეკომპანიის წინააღმდეგ განხორციელებულ ქმედებებს დაუკავშირა. მან აღიარა, რომ ტელეკომპანიას საგადასახადო დავალიანება აქვს, თუმცა აღნიშნა, რომ ეს სწორედ სახელმწიფოს მხრიდან განხორციელებული წნეხის შედეგია და მოუწოდა ხელისუფლებას მოუხსნას ყადაღა "რუსთავი 2-ს" და არხი დავალიანებას გადაიხდის.  

გვარამიამ, ქუმსიშვილის დღევანდელი განცხადება ხელისუფლების მხრიდან "რუსთავი 2"-ის წინააღმდეგ მორიგი შეთქმულების ნაწილად წარმოაჩინა და მთავრობა თვითმმართველობის არჩევნების წინ ყველაზე დაბალანსებული ტელევიზიის დახურვის სურვილში დაადანაშაულა.   

დღეს, ფინანსთა მინისტრის დიმიტრი ქუმსიშვილის დღეს განაცხადა, რომ  „რუსთავი 2“-თან მოლაპარაკება მიმდინარეობს ფინანსური დავალიანების გადახდის გრაფიკთან დაკავშირებით. 

"მე პირადად, მიმაჩნია, რომ ეს არის არაკონკურენტუნარიანი გარემო. ამას უკვე აღარ ვამბობ, როგორც ფინანსთა მინისტრი, რომლის უშუალო მოვალეობა გადასახადების ამოღებაა, ამას ვამბობ როგორც ადამიანი, რომლის პასუხისმგებლობაც არის ეკონომიკის განვითარება და ზოგადად, ეკონომიკური ბლოკი. ყველამ უნდა გადაიხადოს გადასახადი. როცა ერთი კომპანია არ იხდის გადასახადებს, ის არაკონკურენტულ გარემოშია და შესაბამისად, სხვა კონპანიებისგან განსხვავებით, მას მეტი ფული რჩება. მას აქვს შესაძლებლობა უკეთესი თანამშრომლები იქირაოს, უკეთესი ტექნიკა შეიძინოს, უკეთესი გადაცემები გააკეთოს, რაც, რა თქმა უნდა, არაკონკურენტულ გარემოს ქმნის. ეს არ ეხება კონკრეტულად "რუსთავი 2"-ს, ეს ეხება ზოგადად ყველას", - განაცხადა დიმიტრი ქუმსიშვილმა.

მისივე თქმით, ის დარწმუნებულია, რომ "რუსთავი 2"-თან გადასახადის გადახდის გრაფიკი მიღწეული იქნება.