სერგეენკო: მეორე სართულიდან გადმოვარდნილ ბავშვს ქალა-ტვინის და გულ-მკერდის ბლაგვი ტრავმა აქვს

საქართველოს ჯანდაცვის მინისტრის დავით სერგეენკოს ინფორმაციით, ზემო ფონიჭალაში, 206-ე ბაგა-ბაღის შენობის მეორე სართულიდან გადმოვარდნილ ბავშვს ქალა-ტვინის ტრამვა და გულ-მკერდის ბლაგვი ტრავმა აქვს. 

"ბავშვს აქვს ქალა-ტვინის ტრავმა და გულმკერდის ბლაგვი ტრავმა. ამ ეტაპზე მას ოპერაციული ჩარევა არ ესაჭიროება, თუმცა მდგომარეობა ძალიან საყურადღებო არის და საჭიროებს ინტენსიურ მეთვალყურეობას.“- განაცხადა მინისტრმა. 

მისივე თქმით, ეს ფაქტი ძალიან სწრაფად და დეტალურად უნდა გამოიკვლიონ და დამნაშავენ უნდა აგოს პასუხი. 

დღეს, ზემო ფონიჭალაში 206-ე ბაგა-ბაღის მეორე სართულიდან ბავშვი გადმოვარდა. ბავშვი ინგოროყვას კლინიკაშია გადაყვანილი და მისი მდგომარეობა მძიმეა, თუმცა კონტაქტურია. მას აღენიშნება ფილტვის დაზიანება და მოტეხილობები. ექიმის თქმით, გოგონას სიცოცხლეს საფრთხე არ ემუქრება.

საქმეზე გამოძიება შსს-მ 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე დაზიანებას გულისხმობს. ეს დანაშაული ისჯება ჯარიმით ან გამასწორებელი სამუშაოთი ორ წლამდე ვადით ანდა ორ თვემდე პატიმრობით.

თბილისის მერია დღეს ზემო ფონიჭალაში, 206-ე საბავშვო ბაღში მომხდარ ფაქტს ეხმაურება. თბილისის მერი ავალებს ბაგა-ბაღების მართვის სააგენტოს ხელმძღვანელს, გამოძიების დასრულებამდე, შეუჩეროს უფლებამოსილება ბაგა-ბაღის დირექტორსა და იმ აღმზრდელებს, რომლებიც ამ კონკრეტული შემთხვევისას უშუალოდ ახორციელებდნენ ზედამხედველობას სასწავლო პროცესზე.

ბაგა-ბაღების მართვის სააგენტოს ხელმძღვანელი, თემურ თორდინავა, 206-ე საბავშვო ბაღში მომხდარ შემთხვევას უყურადღებობას უკავშირებს და ამბობს, რომ აცნობიერებს პასუხისმგებლობას, როგორც სააგენტოს ხელმძღვანელი.

თავად 206-ე ბაგა-ბაღის დირექტორის მარინა გოგოლაძის განცხადებით, ბავშვი, რომელიც მეორე სართულიდან გადმოვარდა, სპეციალური საჭიროების მქონეა.  დირექტორი უარყოფს ინფორმაციას, თითქოს გოგონა უყურადღებოდ იყო მიპოვებული.