2018 წელს ეროვნულ გამოცდებზე გარკვეული ცვლილებები იქნება

ერთიანი ეროვნული გამოცდებზე 2018 წელს გარკვეული ცვლილებები შედის. ცვლილება ეხება ზოგადი უნარების, ქართული ენის და ლიტერატურის, ასევე მათემატიკის გამოცდას. ამის შესახებ დღეს გამართულ პრესკონფერენციაზე გამოცდების ეროვნული ცენტრის ხელმძღვანელმა მაია მიმინოშვილმა განაცხადა. 

კერძოდ, 2018 წლის ეროვნულ გამოცდებზე, ქართული ენისა და ლიტერატურის გამოცდაზე არგუმენტირებული ესე 20-ის ნაცვლად 24 ქულით შეფასდება. პირველ დავალებას, ტექსტის რედაქტირებას, რომლის მიზანიც შეცდომების გასწორებაა, მოაკლდა 4 ქულა - 20-ის ნაცვლად უმაღლესი ქულა 16 იქნება. არგუმენტირებულ ესეს დაემატება 4 ქულა და 20-ის ნაცვლად 24 ქულით შეფასდება.

ზოგადად ქართული ენისა და ლიტერატურის გამოცდის უმაღლესი ქულა არ შეიცვლება და 80 იქნება. ზოგადი უნარების გამოცდაში, ვერბალურ ნაწილში, „ანალოგიების ბლოკი“ „წაკითხულის გააზრების ბლოკში“ იქნება გაერთიანებული. გამოცდისთვის განკუთვნილი დრო იგივე რჩება - ვერბალურიც და მათემატიკური ნაწილიც 1 საათი და 35 წუთი.

მაია მიმინოშვილის განცხადებით, შედარებით გამარტივდება დავალებები მათემატიკის გამოცდაში. " ეს არ ნიშნავს იმას, რომ მათემატიკა იმდენად მარტივი იქნება, რომ ვეღარ მოვახერხოთ იმის შეფასება, რისი შეფასებაც გვინდა. ეს გადაწყვეტილება ბევრმა ფაქტორმა განაპირობა. ჩემთვის ძალიან მტკივნეულია, როცა მცირდება იმ აბიტურიენტების რაოდენობა, რომლებიც მათემატიკას ირჩევენ. ", - განაცხადა მაია მიმინოშვილმა.