თბილისის მერია სპეცოპერაციისას დაზარალებულებს დროებით საცხოვრებელს გამოუყოფს

თბილისის მერმა კახა კალაძემ საგანგებო ბრიფინგი გამართა. კალაძემ მწუხარება გამოთქვა სპეცრაზმელის გარდაცვალების გამო და მის ოჯახს მიუსამძიმრა.

თბილისის მერის თქმთ, თბილისში მცხოვრებთა უსაფრთხოება სრულად არის დაცული. მერი მოუწოდებს ბერი გაბრიელ სალოსის ქუჩის მცხოვრებლებს, ვისაც საცხოვრებლის დატოვება მოუწია და არ აქვს ღამის გასათევი ადგილი, დროულად მიმართოს ისნის რაიონის გამგეობას, რომელიც საგანგებო რეჟიმში მუშაობს.

ისნის რაიონის გამგეობა მათ რეგისტრაციაში გაატარებს და დროებითი საცხოვრებელი ფართით უზრუნველყოფს.

კახა კალაძემ გამოაცხადა ნომრებიც, რომლებზეც ასეთმა ადამიანებმა უნდა დარეკონ:

ისნის რაიონის გამგეობა - 2 37 50 29, 599 53 70 40

თბილისის მერია - 2 72 22 22

სპეცოპერაცია, რომელიც 20 საათის განმავლობაში მიმდინარეობდა, დასრულდა. ტერიტორიას ჯავშანტექნიკა და სპეცრაზმი ტოვებს. ტერორიზმში ეჭვმიტანილი სამი პირი სპეცოპერაციის დროს დაიჭრა.

სპეცოპერაციის დროს, სამართალდამცველებსა და ტერორიზმში ეჭვმიტანილებს შორის შეტაკება რამდენჯერმე მოხდა. ერთ-ერთი ასეთი სროლის დროს კი სპეცრაზმელი დაიჭრა, რომელიც საავადმყოფოში რამდენიმე ოპერაციის შემდეგ გარდაიცვალა.

რაც შეეხება ბინას, რომელშიც ტერორიზმში ეჭვმიტანილები ცხოვრობდნენ, პანკისის ხეობაში მცხოვრებს ეკუთვნის. ბოლო ინფორმაციით, ის დუისის პოლიციის განყოფილებიდან ახმეტის პოლიციაში გადაიყვანეს.

ბერი გაბრიელ სალოსის ქუჩაზე, სპეცოპერაცია ღამით დაიწყო.