გია ვოლსკი პარლამენტში ძალოვანი მინისტრების მისვლას ითხოვს

პარლამენტის ვიცესპიკერი გია ვოლსკი მიიჩნევს, რომ ბერი გაბრიელის ქუჩაზე ჩატარებულ სპეცოპერაციასთან დაკავშირებით, საკანონმდებლო ორგანოში ძალოვანი მინისტრები უნდა გამოცხადდნენ.  როგორც ჟურნალისტებს ვოლსკიმ განუცხადა, მომხდარი ფაქტი მხოლოდ საქართველოს უსაფრთხოებას არ ეხება. ამის შესახებ 1tv წერს.

"არავინ იცის, ეს არის თუ არა ჩატაევი. ანტიტერორისტულ ბრძოლაში ჩართული ქვეყნის ინტერესია, რომ ამ მიმართულებით ერთიანი სტრატეგია იყოს და ეს საერთო ბრძოლაში მხოლოდ ეპიზოდია, რაც გვაქვს. არ შეიძლება, ამ საკითხთან დაკავშირებით ზედაპირული განცხადებები გაკეთდეს ან დახურულ სხდომაზე, ან ღია სხდომაზე. საზოგადოებას არასწორი, ან ნაწილობრივი ინფორმაცია არ უნდა მიეწოდოს. მეგონა, რომ ოპოზიციას ამ თემის სერიოზულობა გათვითცნობიერებული ჰქონდა, რადგან ოპოზიციის ზოგიერთმა წარმომადგენელმა სერიოზული განცხადება გააკეთა, რომ ქართველ და ამერიკელ ექსპერტებს ერთობლივ მუშაობაში ხელი არ უნდა შეეშალოს. როგორც ჩანს, გადაწყვიტეს, რომ სჯობს, პოლიტიკური სპეკულაციების ფორმატს დაუბრუნდნენ“, – აღნიშნავს დეპუტატი.

გია ვოლსკი ჯერჯერობით, ვერ აკონკრეტებს, თუ რა ფორმატში უნდა წარიმართოს მინისტრების მოსმენა. ძალოვანი მინისტრების მისვლას პარლამენტში უმცირესობაც ითხოვს.

დღეს ცნობილი გახდა, რომ თბილისში, სპეცოპერაციის დროს დაკავებული პირი საედი დუდაევია და არა ჩეჩენი მებრძოლი სუხო დუდაევი, რომელიც 2010 წელს ლაფანყურის სპეცოპერაციაშიც მონაწილეობდა. მანამდე ვრცელდებოდა ინფორმაცია, თითქოს დაკავებული სუხო დუდაევი იყო.

სპეცოპერაცია 22 ნოემბერს საღამოს დასრულდა. სახელმწიფო უსაფრთხოების სამსახურის ინფორმაციით, დაკავებულია 1 ადამიანი, ხოლო სამი მოკლულია.

სპეცოპერაციის დროს, სამართალდამცველებსა და ტერორიზმში ეჭვმიტანილებს შორის შეტაკებას ერთი სპეცრაზმელი ემსხვერპლა, ოთხი კი დაიჭრა.