ომბუდსმენობის კანდიდატი გიორგი ფოფხაძე დეპუტატებს თავის ხედვებს Skype-ით აცნობს

ადამიანის უფლებათა კომიტეტის სხდომაზე სახალხო დამცველის კიდევ ერთ კანდიდატს გიორგი ფოფხაძეს უსმენენ, რომელიც პატრიოტთა ალიანსმა დაასახელა.

ფოფხაძე კომიტეტის წევრებს საკუთარ ხედვებს Skype-ის დახმარებით აცნობს, ვინაიდან ის საქართველოში არ იმყოფება. 

"დედამიწის ზედაპირზე მგონი პირველი პრეცენდენტია საუბრის ასეთი ფორმატი. მე მინდოდა ყველა კომიტეტს შევხვედროდი და გავსაუბრებოდი, ამიტომ თუ შესაძლებელია, მე ვითხოვ დღეს არ ჩატარდეს კენჭისყრა და მე შევძლო ყველა კომიტეტს გავაცნო ჩემი ხედვები. მე ვერ მხედავენ, ვერც დეპუტატებს ვხედავ, რადიოჟურნალისტიკასავით არის. ჩვენ და "ქართულ ოცნებას" ძალიან ბევრი საერთო მეგობარი გვყავს, მე ვარ ის პიროვნება, რომელმაც მამუკა მდინარაძის დაჭერის საქმე ევროსტრუქტურებში მიიტანა. პირველ რიგში ვაპირებ სრულიად ევროპულ რელსებზე გადავიყვანო სახალხო დამცველის აპარატი, რომ ნებისმიერი მოქალაქე განურჩევლად რელიგიური მრწამსისა, წარმომავლობისა, სქესისა, ეთნიკური წამრომავლობისა თუ სექსუალური ორიენტაციისა, იყოს თანაბრად დაცული. პირველ რიგში, ჩვენ უნდა ვიყოთ ყველა რელიგიის წარმომადგენლის თანაბრად დამცველები",- განაცხადა გიორგი ფოფხაძემ.

პატრიოტთა ალიანსის ლიდერი ირმა ინაშვილი აცხადებს, რომ გიორგი ფოფხაძე არის არამხოლოდ ჟურნალისტი, არამედ ადამიანის უფლებებბის აქტიური დამცველი. ინაშვილის შეფასებით, ფოფხაძე საქართველოში მიმდინარე პოლიტიკურ პროცესებშიც აქტიურად მონაწილეობდა 90-იანი წლებიდან მოყოლებული. ინაშვილი ფიქრობს, რომ ომბუდსმენობის შემთხვევაში ფოფხაძე პოლიტიკური წნეხის ქვეშ არ მოექცევა და მან უმრავლესობის წევრებს გიორგი ფოფხაძის მხარდაჭერისკენ მოუწოდა.

"გიორგი ფოფხაძის გამოცდილება და განვლილი გზა არანაირად ნაკლები არ არის და ბევრ შემთხვევაში აღემატება ქალბატონი ლომჯარიას გამოცდილებას",- განაცხადა ირმა ინაშვილმა.

პარლამენტი დღეს სახალხო დამცველს აირჩევს. 

კანონმდებლებს არჩევანის გაკეთება ნინო ლომჯარიასა და გიორგი ფოფხაძეს შორის მოუწევთ. 

ომბუდსმენობის კანდიდატს ნინო ლომჯარია მხარდაჭერა „ნაციონალურმა მოძრაობამაც“ გამოუცხადა. მანამდე კი იყო საკომიტეტო მოსმენა, სადაც ლომჯარიამ საკუთარი ხედვა წარადგინა. ერთადერთი, ვისაც აღნიშნული კანდიდატურა არ მოსწონს, „პატრიოტთა ალიანსია“, მათ საკუთარი ფავორიტი ჰყავთ. „ევროპული საქართველო“ კი პროცესებს ემიჯნება.