ირაკლი კობახიძე უკრაინის რადას თავჯდომარეს შეხვდა

"ჩვენი საერთო გამოწვევაა რუსული აგრესია, ტერიტორიების ოკუპაცია და ამ მიმართულებით თანამშრომლობა ძალიან მნიშვნელოვანია"- ამის შესახებ საქართველოს პარლამენტის თავმჯდომარემ, ირაკლი კობახიძემ, უკრაინის რადას თავმჯდომარე ანდრეი პარუბისთან გამართული შეხვედრის დროს განაცხადა. 

კობახიძის თქმით, საქართველოსა და უკრაინას შორის ამ და სხვა თემებზე თანამშრომლობა ძალიან მნიშვნელოვანია. „ჩვენი საერთო გამოწვევაა რუსული აგრესია, ტერიტორიების ოკუპაცია და ამ მიმართულებით თანამშრომლობა ძალიან მნიშვნელოვანია. აქტიურად უნდა გამოვიყენოთ თანამშრომლობის როგორც ორმხრივი, ისე მრავალმხრივი ფორმატები იმისათვის, რომ მიზნებს მივაღწიოთ და საერთო ინტერესების რეალიზება შევძლოთ. 

პოლიტიკურ თანამშრომლობასთან ერთად, ძალიან მნიშვნელოვანია თანამშრომლობის ეკონომიკური განზომილება. ბევრს ვმუშაობთ იმისთვის, რომ გავაძლიეროთ ჩვენი ქვეყნის ეკონომიკური რესურსები და ტრანზიტული სტრატეგიული ფუნქცია. ორმხრივი თანამშრომლობა საქართველოსა და უკრაინას შორის ამ კუთხითაც ძალიან მნიშვნელოვანია“,- აღნიშნა საქართველოს პარლამენტის თავმჯდომარემ. 

ირაკლი კობახიძემ ქვეყნებს შორის ურთიერთობებიც მიმოიხილა და უკრაინას, საქართველოს სუვერენიტეტისა და ტერიტორიული მთლიანობის მხარდაჭერისთვის მადლობა გადახადა. პარლამენტის თავმჯდომარემ, კიდევ ერთხელ დააფიქსირა საქართველოს მტკიცე მხარდაჭერა უკრაინის ტერიტორიულ მთლიანობასთან მიმართებით და უკრაინის აღმოსავლეთ რეგიონში, რუსული მხარის ქმედებები დაგმო. 

„ხალხებს შორის ურთიერთობა და მეგობრობა განსაკუთრებულ პასუხისმგებლობას გვაკისრებს, რომ ჩვენი წვლილი შევიტანოთ ამ ურთიერთობების კიდევ უფრო განვითარებაში. მადლობა მინდა გადავუხადო ჩვენს უკრაინელ მეგობრებს იმისათვის, რომ ისინი მთელი ამ წლების მანძილზე განუხრელად უჭერდნენ მხარს ჩვენს სუვერენიტეტს და ტერიტორიულ მთლიანობას. საქართველოსთვის ყველაზე მძიმე წუთებში უკრაინა, ჩვენი უკრაინელი მეგობრები იდგნენ ქართველი ხალხის და ჩვენი სახელმწიფოს გვერდით. 

კიდევ ერთხელ ვადასტურებთ მხარდაჭერას უკრაინის მიმართ და ვადასტურებთ ტერიტორიული მთლიანობის, სუვერენიტეტის უპირობო მხარდაჭერას. ვგმობთ ყირიმის ანექსიას და ასევე, რუსეთის ფედერაციის აგრესიულ და უკანონო ქმედებებს უკრაინის აღმოსავლეთ რეგიონში. ჩვენს ქვეყნებს აკავშირებს საერთო გამოწვევები და საერთო მიზნები. ძალიან მნიშვნელოვანია ჩვენი ძალისხმევის გაერთიანება იმისათვის, რომ ამ გამოწვევებს ვუპასუხოთ და ჩვენს საერთო მიზნებს მივაღწიოთ. ჩვენი საერთო მიზანია ევროკავშირში და ნატოში გაწევრიანება და ძალისხმევის გაერთიანება ამ კუთხითაც განსაკუთრებით მნიშვნელოვანია“,- განაცხადა ირაკლი კობახიძემ.