ოცნების ფრაქცია გირგვლიანის საქმის პრეცედენტზე საკანონდებლო პაკეტს შექმნის

„ფრაქცია „ქართული ოცნება“ მუშაობას იწყებს „გირგვლიანის შესწორებებზე“, რითაც ჩვენ ხელისუფლების წარმომადგენლებისთვის შეზღუდვის მაღალ სტანდარტს ვაწესებთ, რათა ვეღარასდროს ვერავინ გაბედოს მართლმსაჯულების აღსრულებისათვის ხელის შეშლა, - ამის შესახებ ფრაქცია „ქართული ოცნების“ თავმჯდომარე მამუკა მდინარაძემ დღეს გამართულ ბრიფინგზე განაცხადა, სადაც მან ახალ საკანონმდებლო ინიციატივაზე ისაუბრა.

ბრიფინგზე მამუკა მდინარაძემ აღნიშნა, რომ „ქართული ოცნება“ ვალდებულად თვლის თავს საზოგადოების წინაშე, არამარტო მართლმსაჯულება აღსრულდეს სანდრო გირგვლიანისა და სხვა ანალოგიურ საქმეებზე, არამედ შეიქმნას პოლიტიკური, სამართლებრივი ბარიერები გირგვლიანის საქმის რეციდივების გამოსარიცხად.

„12 წელი გავიდა სანდრო გირგვლიანის მკვლელობიდან, რომლიც რეჟიმის მხრიდან ადამიანის მიმართ ძალადობის სიმბოლოდ იქცა. ეს საქმე ქართულ რეალობაში, გარკვეული თვალსაზრისით, პოლიტიკური ღირებულების განმსაზღვრელიც გახდა. შესაბამისად, სანდრო გირგვლიანის საქმე მხოლოდ სამართლებრივი პროცესი არ ყოფილა. სამართლებრივად საქმეზე სასჯელს იხდის 8 პირი და მსჯავრდებულია ექსპრეზიდენტი სააკაშვილი. თუმცა, ძალიან მნიშვნელოვანია, რომ ვეღარასდროს ვერავინ გაბედოს ამ საქმის, ამ გაკვეთილის არასწორი ინტერპრეტაცია. სანდრო გირგვლიანის მკვლელობიდან ზუსტად 12 წლის თავზე, საქმის ერთ-ერთმა მთავარმა მონაწილემ გაბედა და გარდაცვლილის ოჯახის, ქართველი ერის მიმართ შეურაცხმყოფელი განცხადებით გამოვიდა. მან სანდრო გირგვლიანის ტრაგედიას, საზოგადოების რეაქციას წარმოუდგენელ უსამართლობაზე პოლიტიკური ცირკი უწოდა”, – განაცხადა მამუკა მდინარაძემ.

მისივე თქმით, საქართველოს პრეზიდენტი შეეცადა, გახმაურებული საქმე შეეფუთა, როგორც სახელმწიფო მანქანის მიერ მკვლელობის სამწუხარო, მაგრამ ბანალური ფაქტი, ხოლო გირგვლიანის მკვლელობაში ბრალდებულების შეწყალება-ინსტიტუტების მიერ მომზადებული პროცესი და არა პიროვნული გადაწყვეტილება.

„ფრაქცია იწყებს მუშაობას საკანონმდებლო ინიციატივათა პაკეტზე, რომელიც, ერთი მხრივ, უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორე მხრივ, უზრუნველყოფს მართლმსაჯულების ხელშეუვალობას - ეს იქნება ცვლილებების მთავარი არსი. რასაკვირველია, ახალი რეგულაცია ვერ გავრცელდება ძველ შემთხვევებზე და შეეხება მხოლოდ მოქმედ და მომავალ ხელისუფლებებს. ამ ცვლილებებს სიმბოლურად შეიძლება „გირგვლიანის შესწორებები” დავარქვათ”, - განაცხადა მამუკა მდინარაძემ. 

28 იანვარს სანდრო გირგვლიანის გარდაცვალებიდან 12 წელი გავიდა. 2006 წლის 28 იანვარს გირგვლიანი პოლიციის მაღალჩინოსნებმა ოქროყანის სასაფლაოზე მოკლეს. 12 წლის შემდეგ მის მკვლელობაზე გამოძიება ისევ გრძელდება.

5 იანვარს, მოსამართლე გიორგი არევაძემ სანდრო გირგვლიანის საქმეზე მიხეილ სააკაშვილი დამნაშავედ ცნო. საქმეში ბრალდებულია ასევე დათა ახალაია და ვანო მერაბიშვილი. თუმცა გირგვლიანის ოჯახის ადვოკატი შალვა შავგულიძე ამბობს, რომ ამ საქმეზე ჯერ კიდევ ბევრ შეკითხვაზე პასუხი გაცემული არ არის.