31 იანვარს პრაღაში აბაშიძე-კარასინის მორიგი შეხვედრა გაიმართება

დღეს, 31 იანვარს პრაღაში ერთმანეთს რუსეთთან ურთიერთობების საკითხებში საქართველოს პრემიერმინისტრის სპეციალური წარმომადგენელი ზურაბ აბაშიძე და რუსეთის საგარეო საქმეთა მინისტრის მოადგილე გრიგორი კარასინი შეხვდებიან.

ეს მათი 37-ე შეხვედრა იქნება. არსებული ინფორმაციით, ზურაბ აბაშიძე გრიგორი კარასინთან რამდენიმე საკითხის დაყენებას გეგმავს, მათ შორის არის საბაჟო მონიტორინგის შესახებ შეთანხმება, რომელიც საბაჟო კორიდორების ნეიტრალური მონიტორების მიერ გაკონტროლებას გულისხმობს და რომელზეც ხელი რუსეთს ჯერ არ მოუწერია.

„მოგეხსენებათ 2011 წლის საბაჟო მონიტორინგისა და ადმინისტრირების თაობაზე შეთანხმების შესაბამისად, ქართულმა მხარემ გასული წლის დეკემბერში შვეიცარიულ კომპანიასთან გააფორმა კონტრაქტი, ახლა რუსეთის ჯერია, რუსეთმაც უნდა გააფორმოს ანალოგიური კონტრაქტი შვეიცარულ კომპანიასთან, ამის შემდეგ უნდა დაიწყოს ამ პროექტის იმპლემენტაცია. სამწუხაროდ, ბატონი კარასინის ინტერვიუში ამოვიკითხეთ ამ შეთანხმების ისეთი ინტერპრეტაცია, როგორიც პრინციპულად ეწინააღმდეგება 2011 წლის შეთანხმების დებულებებსა და არსს, რაც სერიოზულ საფრთხეს უქმნის ამ პროექტის განხორციელებას, ასე რომ ჩვენ ამ თემაზე გვექნება საუბარი და შევეცდებით, დავაზუსტოთ პოზიციები“, - აცხადებს ზურაბ აბაშიძე.

მისი თქმით, რუსეთის მიდგომები ნათლად მიუთითებს, რომ ახლო პერსპექტივაში სერიოზულ და დადებით ცვლილებებს არ უნდა ველოდოთ. 

25 იანვარს გრიგორი კარასინმა “კომერსანტისთვის“ მიცემულ ინტერვიუში განაცხადა, რომ მოსკოვს საქართველოსთან კეთილმეზობლური ურთიერთობების აღდგენა სურს, მაგრამ არა აფხაზეთისა და სამხრეთ ოსეთის ინტერესების ხარჯზე.

ზურაბ აბაშიძე და გრიგორი კარასინი ერთმანეთს ბოლოს 16 ნოემბერს, პრაღაში შეხვდნენ, ეს მათი მეთექვსმეტე შეხვედრა იყო. მხარეებმა ორ ქვეყანას შორის სავაჭრო ეკონომიკური, სატრანსპორტო და ჰუმანიტარული საკითხები განიხილეს. 2011 წელს გაფორმებული საბაჟო მონიტორინგის შესახებ შეთანხმების იმპლემენტაციის საკითხის გარდა, შეხვედრაზე საქარველოს პრემიერის სპეციალურმა წარმომადგენელმა სოფელ ბერშუეთში საოკუპაციო ხაზის გადმოწევის საკითხიც  დააყენა.

პირველი შეხვედრა აბაშიძე-კარასინს შორის 2012 წლის 14 დეკემბერს გაიმართა.