ბათუმში მეჩეთის მშენებლობის ნებართვაზე პირველი სასამართლო სხდომა 20 თებერვალს გაიმართება

ბათუმში ახალი მეჩეთის მშენებლობის ნებართვის თაობაზე პირველი სასამართლო სხდომა 20 თებერვალს გაიმართება. პროცესი 12:00 საათზეა ჩანიშნული.

ბათუმის მერიის წინააღმდეგ სარჩელი მუსლიმმა თემმა 2017 წლის 10 ივნისს შეიტანა. ისინი მათ მიერ შეძენილ მიწის ნაკვეთზე მეჩეთის მშენებლობაზე ნებართვის გაცემას ითხოვენ. გარდა ამისა ბათუმის მერიის მხრიდან დისკრიმინაციული მოპყრობის ფაქტების დადგენასაც მოითხოვენ.

მოსარჩელე მხარე განმარტავს, რომ მშენებლობის ნებართვაზე უარი ბათუმის მერიის მხრიდან დისკრიმინაციული ხასიათისაა, რადგან ეს ტერიტორია საჯაროა და აქ მრავლადაა სხვა საეკლესიო ნაგებობები.

ზოგიერთ შემთხვევაში კი, მუსლიმი თემის თქმით, მშენებლობისთვის საჭირო მიწის ნაკვეთს მართლმადიდებელ ეკლესიას სწორედ ადგილობრივი მუნიციპალიტეტი გადასცემს.

სამართლებრივი დავის პარალელურად, თემი შეძენილ მიწის ნაკვეთზე მშვიდობიან შეკრებასა და რელიგიურ მსახურებას აგრძელებს. ღია სივრცეში ლოცვას ასობით მუსლიმი რეგულარულად უერთდება და ამ გზით მხარდაჭერასა და სოლიდარობას უცხადებენ ახალი მეჩეთის მშენებლობის პროცესს.

მუსლიმი თემის ინტერესებს ბათუმის საქალაქო სასამართლოში არასამთავრობო ორგანიზაციების EMC-ისა და TDI-ის იურსიტები იცავენ.

ბათუმში ახალი მეჩეთის მშენებლობის ფონდმა ბათუმის მერიას გასული წლის 8 თებერვალს მიმართა, მერიამ უარყოფითი პასუხი ფონდს 5 მაისს წერილობით გაუგზავნა და უარი იმ მოტივით დაასაბუთა, რომ ეს ტერიტორია მაღალი ინტენსივობის საცხოვრებელი ზონაა, სადაც განაშენიანების მეტი წილი საცხოვრებელ სახლებს უჭირავს, საკულტო ნაგებობა კი საზოგადოებრივი თავშეყრის ადგილია.

10 ივნისს მშენებლობაზე დავამ სასამართლოში გადაინაცვლა.