ზურაბ ჩეკურაშვილი: აზიურ ფაროსანას ერთად დავამარცხებთ

თბილისში აზიურ ფაროსანასთან დაკავშირებით სამეცნიერო შეხვედრა მიმდინარეობს, რომელშიც ქართველი და ამერიკელი ექსპერტები მონაწილეობენ. როგორც შეხვედრაზე სურსათის ეროვნული სააგენტოს ხელმძღვანელი ზურაბ ჩეკურაშვილი ამბობს, სახელმწიფო თითოეულ მოქალაქესთან ერთად შესაბამის პასუხს გასცემს იმ გამოწვევას, რომელსაც აზიური ფაროსანა ჰქვია.

"ჩვენ ერთობლივად დავამარცხებთ ამ მწერს და ამაში ეჭვი არავის  შეეპაროს" - თქვა ჩეკურაშვილმა. ამის შესახებ 1tv წერს.

მან მადლობა გადაუხადა შეხვედრის ორგანიზატორებს, USAID/REAP-ს და საქართველოს მეცნიერებათა აკადემიას, რომლებმაც აშშ-ის უნივერსიტეტებიდან წამყვანი მეცნიერები მოიწვიეს.

„ჩვენთვის ძალიან მნიშვნელოვანია ის ფაქტი, რომ გარემოს დაცვისა და სოფლის მეურნეობის სამინისტროს სურსათის ეროვნული სააგენტოს სამუშაოები ამ სპეციალისტების მიერ შეფასებული იქნა, როგორც უმაღლესი ხარისხის. ეს ჩვენ გვიმტკიცებს რწმენას, რომ სწორი გზით მივდივართ და 2018 წლისთვის დაგეგმილი ღონისძიებები, თანამედროვე ტექნოლოგიების შესაბამისია. რაც შეეხება ძირითად ღონისძიებებს, ეს გახლავთ პირველ რიგში, მოსახლეობის ცნობიერების ამაღლება, საქართველოს მასშტაბით თანამედროვე მონიტორინგის სისტემის არსებობა, ქიმიური ღონისძიებები და  კიდევ, ერთ-ერთი  მნიშვნელოვანი კომპონენტი -სამეცნიერო კვლევები, მათ შორის ბიოლოგიურ ანტაგონისტზე“, – განაცხადა ზურაბ ჩეკურაშვილმა და აღნიშნა, რომ სიღრმისეული კვლევის გარეშე, წინასწარ არაფერი იქნება დაგეგმილი.

შეხვედრაში მონაწილეობენ ამერიკის შეერთებული შტატების უნივერსიტეტებისა და კვლევით ცენტრების მეცნიერები, სურსათის უვნებლობის სააგენტოსა და გარემოს დაცვისა და სოფლის მეურნეობის სამინისტროს წარმომადგენლები.

6 მარტს ცნობილი გახდა, რომ USAID ფაროსანასთან ბრძოლისათვის საქართველოს 3,5 მილიონ დოლარს გამოუყოფს.

აზიური ფაროსანა დასავლეთ საქართველოში 2015 წელს დაფიქსირდა. თხილის მწარმოებელთა ასოციაციის ინფორმაციით, მხოლოდ 2016 წელს მავნებელმა მწერმა მეთხილეობის დარგს 50-60 მილიონი ლარის ზარალი მიაყენა. რა თანხა იზარალეს ფერმერებმა 2017 წელს, ჯერჯერობით უცნობია.