მარგველაშვილმა ბაქრაძის შეწყალების მთავარი მოტივები განმარტა და ძალადობაში ბრალდებულთა შეწყალების პროცესი დროებით შეწყვიტა

საქართველოს პრეზიდენტი და შეწყალების კომისიის თავმჯდომარე ბარნოვის ქუცაზე მომხდარ მკვლელობაში ბრალდებულის ვეფხია ბაქრაძის შეწყალების საქმეზე საგანგებო ბრიფინგს მართავენ.

გიორგი მარგველაშვილის თქმით, ის შეძრწუნებულია მკვლელობით და საზოგადოებას კითხვები სრულიად ლეგიტიმურად გაუჩნდა.

2014 წელს ეჭვმიტანილმა ჩაიდინა ძალადობის აქტი თავის მეუღლის მიმართ, მაშინ არ დაუკავებიათ და დააკავეს მოგვიანებით ავარიის გამო. მან ერთხელ მიმართა შეწყალების კომისიას, მაგრამ პრეზიდენტის თქმით, მაშინ მისი თხოვნა არ დააკმაყოფილეს.

მეორე მიმართვის დროს კომისიაში შევიდა რამდნეიმე მნიშვნელოვანი საბუთი, მათ შორის სასჯელაღსრულების სისტემიდან მსჯავრდებულის კარგი დახასიათება და ჯანმრთელობის მდგომარეობაზე დადებითი დასკვნები, თავად მსჯავრდებულის აღიარება და მისი ოჯახის გამოხატული სურვილი, რომ ის გაეთავისუფლებინათ. პრეზიდენტმა აღნიშნა, რომ ამ ბოლო ფაქტთან დაკავშირებით მეტ დეტალს ვერ გაასაჯაროებს.

პრეზიდენტმა ასევე განაცხადა, რომ დროებით შეწყდება ძალადობრივ დანაშაულთან მიმართებაში შეწყალების აქტების გამოცემა. 

"ჩვენ დროებით ვწყვეტთ ძალადობრივ დანაშაულთან მიმართებაში შეწყალების აქტების გამოცემას, სანამ არ გავივლით კონსულტაციას შეწყალების პროცესის ყველა აქტორთან, რაც თავის თავში მოიცავს არა მარტო სახელმწიფო უწყებებს, ვინც ჩვენ გვაძლევს დახასიათებებს, არამედ აგრეთვე იმ ჯგუფებს, რომლებიც სპეციფიკურად ძალადობაზე მუშაობენ, ქალთა მიმართ ძალადობაზე მუშაობენ და შესაძლოა, მოგვცენ უფრო მეტი დაკონკრეტებული რჩევა ამ თემების გააზრებასთან დაკავშირებით. მხოლოდ ამის შემდეგ აღადგენს კომისია გადაწყვეტილების მიღების პროცესს ძალადობრივ დანაშაულებებთან მიმართებაში“, - განაცხადა გიორგი მარგველშვილმა.

მანამდე ცნობილი გახდა, ვეფხია ბაქრაძის შეწყალების მოთხოვნით პრეზიდენტს ყოფილმა ცოლმა თავად მიმართა. 

ბარნოვის ქუჩაზე მკვლელობის ბრალდებით დაკავებული 1972 წელს დაბადებული ბაქრაძე 2015 წელს ოჯახის წევრის ჯანმრთელობის მძიმე დაზიანებას და ტრანსპორტის მოძრაობის უსაფრთხოების წესის დარღვევის ბრალდებით იყო დაკავებული, პრეზიდენტის შეწყალების საფუძველზე სასჯელი გაუნახევრდა და საპატიმრო დაწესებულება ვადაზე ადრე, 2017 წლის 25 მაისს დატოვა, - ამის შესახებ 14 აპრილს შსს-ში გამართულ ბრიფინგზე შინაგან მინისტრის მოადგილე ნათია მეზვრიშვილმა განაცხადა.

მკვლელობა ბარნოვის ქუჩაზე 13 აპრილს, საღამოს მოხდა. მოკლულია 1993 წელს დაბადებული თაკო გამრეკელაშვილი, რომელიც, არსებული ინფორმაციით, მცირეწლოვან შვილებთან ერთად დასთან იყო. ის სახლში ბავშვების თვალწინ მოკლეს.

დაღუპულის დედის მეგობარი კაცი, 1972 წელს დაბადებული ვეფხია ბაქრაძე, სოფელ თელეთში გუშინ დააკავეს. დაკავებულია კიდევ ერთი პირი, რომელსაც გამოძიება დანაშაულის შეუტყობინებლობას ედავება.