ჟურნალისტები ყალბ ამბებთან საბრძოლველად მედია წიგნიერების მნიშვნელობაზე საუბრობენ

საქართველოს კომუნიკაციების ეროვნული კომისია ქვეყანაში მედია წიგნიერების გასავითარებლად მედია აკადემიას აფუძნებს. ამის შესახებ დღეს ჟურნალისტებისთვის გამართულ სემინარზე კომისიის ხელმძღვანელმა კახა ბექაურმა განაცხადა.

კომისიის მიერ ორგანიზებულ სემინარს მედიასაშუალებების წარმომადგენლები დაესწრნენ. სემინარს პროფესორი მიჩ სემელი უძღვებოდა. სემინარის დასასრულს კი თავიანთი მოსაზრება დააფიქსირეს მედია წინგიერებასა და, ზოგადად, ყალბ ამბებთან ბრძოლასთან დაკავშირებით.

ჟურნალისტი ირაკლი აბსანძე მედია წიგნიერების პროექტს აფასებს და ამბობს, რომ მთელ მსოფლიოში პროპაგანდასთან და ყალბ ამბებთან საბრძოლველად ერთადერთი ინსტრუმენტი არსებობს და ეს ინსტრუმენტი მედია წიგნიერებაა. 

"პროფესორი მიჩ სემელი თავისი გამოცდილებით ერთ-ერთი კარგად ინფორმირებული მედიამენეჯერია და ძალიან კარგია, რომ მასთან ურთიერთობის საშუალება გვექნება ეს ორი დღე. ჩვენთვის, საზოგადოებრივი მაუწყებლისთვის, მნიშვნელოვანია მისი გამოცდილება ვინაიდან ის ამერიკის საზოგადოებრივი მაუწყებლის ხელმძღვანელ თანამდებობაზე მუშაობდა, მას აქვს როგორც კერძო, ასევე საზოგადოებრივ მაუწყებელში მუშაობის გამოცდილება და ამიტომ პირადად ჩემთვის ესეც საინტერესო თემაა, რით განასხვავებს ის ამ ორ სპეციფიკას. ხოლო მთავარი მიმართულება, რასაც ეს  სემინარი ემსახურება მედია წიგნიერებაა. მთელი მსოფლიო და ალბათ ეს პროფესიონალიც სწორედ მედია წიგნიერებას მოიაზრებს პროპაგანდის და ყალბი ახალი ამბების წინააღმდეგ ბრძოლის ეფექტურ მექანიზმად. და ვფიქრობ ამ ტრენინგსაც დიდი როლი აქვს ამ მიმართულებით“,- თქვა "კვირის ინტერვიუს" ავტორმა და წამყვანმა ირაკლი აბსანძემ. 

მისივე თქმით, მნიშვნელოვანია, რომ ეს არ იქნება ერთჯერადი სემინარი და რომ პერმანენტულად გაგრძელდება მედიისთვის პროფესიონალების ჩამოყვანა და სხვადასხვა კურსები გაკეთდება. 

"იმის ფუფუნება, რომ კვალიფიციური და მაღალი დონის მედიამენეჯერები ჩამოიყვანონ არ აქვს არცერთ მედია ორგანიზაციას. ამას გააკეთებს მარეგულირებელი კომისია, რა თქმა უნდა, ეს შანსია ჩვენთვისაც ჟურნალისტებისთვის და შანსია პროდუქტის მომხმარებელებისთვის. მედია წიგნიერება არაფერია გარდა იმისა, რომ ჩვენ შევძლოთ სწორი და არასწორი, ყალბი და ნამდვილი ახალი ამბების განსხვავება და არ მოვატყუოთ მომხმარებელი. ეს არის ძალიან მარტივად თქმული მაგრამ ძალიან რთული თემა და ამ რთული თემის გაშლას აპირებს კომისია ინსტიტუციურ დონეზე“,- განაცხადა ირაკლი აბსანძემ. 

ჟურნალისტი ნინო ზურიაშვილი კომუნიკაციების ეროვნული კომისიის ახალ ფუნქციას, რომელიც ქვეყანაში მედია წიგნიერების განვითარებას და ხელშეწყობას ეხება, მედიისთვის სასიკეთოს და მნიშვნელოვანს უწოდებს. 

"საქართველოში მედია საშუალებებს არ აქვთ იმის საშუალება, რომ თავად მოიწვიონ ავტორიტეტული ტრენერები, არადა ცოდნის განახლება არის კრიტიკულად მნიშვნელოვანი. მითუმეტეს დღეს, როცა მაყურებელი და ინფორმაციის მომხმარებელი იცვლის ქცევას და ტელევიზიიდან გადადის სოციალურ ქსელში, და მედიაც ზუსტად ამავეს აკეთებს. მედია ცდილობს თავისი კონტენტი სოციალურ მედიას მოარგოს და ეს არ არის ასეთი ადვილი საქმე. თუ მედიას არ იქნება იმის ცოდნა, როგორ უნდა გაავრცელოს თავისი კონტენტი სოციალურ ქსელში და ონლაინ პლატფორმებზე, ისე თანამედროვე გამოწვევებს ვერ ვუპასუხებთ. ამ კუთხით, ცოდნის განახლება ჩვენთვის არის ძალიან მნიშვნელოვანი. მედია წიგნიერების ფუნქცია, რაც კომისიამ აიღო თავის თავზე, არის ძალიან სასიკეთო საქმე მედიისთვის. ეს პროექტი კიდევ უფრო ბევრ სიკეთეს გაუკეთებს ქართულ მედიას თუ კომისია გააგრძელებს და ხშირად ჩამოიყვანს ტრენერებს ამ მიმართულებით“,- განაცხადა ჟურნალისტმა ნინო ზურიაშვილმა.

კომუნიკაციების ეროვნული კომისიის თავმჯდომარემ კახა ბექაურმა ყალბ ამბებთან ბრძოლის წინააღმდეგ პროექტების განხორციელების შესახებ "იმედის კვირის" ეთერში, რამდენიმე თვის წინ პირველად განაცხადა.