პრემიერი: საქართველოში სპორტულ აქტივობებში ჩართულთა რაოდენობა უნდა გავაორმაგოთ

მთავრობის ადმინისტრაციაში, გიორგი კვირიკაშვილის ინიციატივით, ქვეყანაში ჯანსაღი ცხოვრების წესის ხელშეწყობის სამოქმედო გეგმის შემუშავებასთან დაკავშირებით, შეხვედრა გაიმართა.

როგორც პრემიერმა განაცხადა, დღეიდან სამი წლის განმავლობაში უნდა გაორმაგდეს იმ ადამიანების რაოდენობა, რომლებიც სპორტულ აქტვიობებში არიან ჩართულები. პრემიერის თქმით, ხელისუფლების პოლიტიკის ერთ-ერთი მთავარი პრიორიტეტი და მიმართულება ჯანსაღი ცხოვრების წესის დამკვიდრება იქნება.

ამ მიზნით, დღეიდან საქართველოში არსებული სპორტული ინფრასტრუქტურის შეფასება იწყება.

"ჩვენ, უმოკლეს პერიოდში შევაფასებთ არსებულ საჭიროებას, თუ რა ტიპის ინფრასტრუქტურა უნდა შეიქმნას ქვეყანაში ევროპული სტანდარტის მიხედვით, მოსახლეობის კონკრეტულ რაოდენობაზე გათვლითა და გეოგრაფიული განაწილებით, რათა მივიღოთ გეოგრაფიულად სწორი განშლა და ხელმისაწვდომობა. რაც შეეხება ფინანსურ ხელმისაწვდომობას, რა თქმა უნდა, ჩვენ ეს ინფრასტრუქტურა უნდა გავხადოთ ხელმისაწვდომი მთლიანად მოსახლეობისთვის, მათ შორის - ეკონომიკურად შეჭირვებული ფენებისთვის. ამიტომ, შემუშავდება ამ ინფრასტრუქტურის მართვის, სუბსიდირების სპეციალური პოლიტიკა, რომელიც მიმართული იქნება, როგორც სპორტულ-გამაჯანსაღებელი, ასევე - სოციალური კუთხით", - განაცხადა პრემიერმინისტრმა გიორგი კვირიკაშვილმა.

პრემიერის დავალების შესაბამისად, არსებული ინფრასტრუქტურისა და საჭიროებების შეფასება ერთი თვის ვადაში უნდა დასრულდეს. სამუშაო ჯგუფი აღნიშნულ საკითხზე უახლოეს დღეებში შეიკრიბება. მას შემდეგ, რაც დროში გაწერილი გეგმა მომზადდება, პრიორიტეტები, თვისობრივად სხვა დონეზე, სახელმწიფო ბიუჯეტში აისახება.

„მიუხედავად იმისა, რომ ბოლო წლების მანძილზე საქართველოში სპორტსმენებისა და სპორტში ჩართული ადამიანების რაოდენობა მნიშვნელოვნად გაიზარდა, ჯერ კიდევ, სპორტული აქტივობების მიხედვით, საქართველოში საშუალო ევროპული მაჩვენებლის ნახევარიც არ არის. ეს მაჩვენებელი დღეიდან 3 წლის განმავლობაში უნდა გავაორმაგოთ და ევროპულ მაჩვენებელს მივუახლოვოთ. ეს არის ჩვენი გეგმა, რომელიც უმოკლეს პერიოდში დაიდება. ქვეყანაში შეიქმნება შესაბამისი ინფრასტრუქტურა, ბიუჯეტში გათვალისწინებული იქნება არა მხოლოდ ინფრასტრუქტურის შესაქმნელი კაპიტალური დანახარჯები, არამედ ეს აისახება მათ შორის სოციალურ მუხლებში, რათა ადამიანებმა შეძლონ ამ ინფრასტრუქტურით სარგებლობა“, - აღნიშნა გიორგი კვირიკაშვილმა.

პრემიერის განცხადებით, ამ საკითხზე უკვე ბევრი აქვს ნამუშევარი ზოგიერთ უწყებას, მათ შორის თბილისის მერიას, სპორტისა და კულტურის, განათლების სამინისტროებს, პარლამენტის შესაბამის კომიტეტებს, კარგი ინიციატივები აქვთ მომზადებული ცალკეულ ფრაქციებს, კერძოდ ფრაქციას - „ქართული ოცნება - ძლიერი საქართველოსთვის“   და ა.შ.

„ჩვენი მიზანია, ერთიან კონტექსტში მოვიყვანოთ ეს, მართვის ერთიანი მოდელი, ერთიანი კონცეფცია ჩამოვაყალიბოთ, როგორ უნდა იმართოს ეს ინფრასტრუქტურა. დღეს ეს ყველაფერი ძალიან გაბნეულია. ჩვენი ინფრასტრუქტურის 80% სახელმწიფოს ხელშია, მხოლოდ 20%-ია კერძო და ჩვენ ამ ინფრასტრუქტურის ერთიანი მართვის მოდელზეც უნდა ჩამოვყალიბდეთ. ბუნებრივია, ძალიან მნიშვნელოვანი იქნება ცნობილი ადამიანების ჩართულობა, კამპანია, კონკრეტული აქტივობები, მათ შორის ყოველ შაბათ-კვირას და, რა თქმა უნდა, ბიზნესის, საქმიანი წრეების ჩართულობა ამ უდიდესი გეგმის განხორციელებაში უკიდურესად მნიშვნელოვანი იქნება. ეს საკითხი ხდება ჩვენი ხელისუფლების ერთ-ერთი უმნიშვნელოვანესი, უმაღლესი პრიორიტეტი“, - განაცხადა პრემიერ-მინისტრმა.

მთავრობის მეთაურთან სამუშაო შეხვედრას აღმასრულებელი და საკანონმდებლო ხელისუფლების წევრები და თბილისის მერი დაესწრნენ.