დღეს გაირკვევა კუპრავას პატიმრობაში დატოვებენ, თუ მხოლოდ ჯარიმას დააკისრებენ

ზაზა სარალიძე საქალაქო სასამართლოში მივიდა, სადაც ზვიად კუპრავა, ლაშა ცუცქირიძე და კიდევ 2 დაკავებული გადაიყვანეს. დღესვე გაირკვევა, კუპრავასა და კიდევ 3 პირს 15-დღიან პატიმრობაში დატოვებენ, თუ მხოლოდ ჯარიმას დააკისრებენ.

ზაზა სარალიძე დარწმუნებულია, რომ ზვიად კუპრავას დაკავება აქციებს უკავშირდება.  სარალიძის მტკიცებით, კუპრავა ყოფილი სამართალდამცველია და მისი მხრიდან კანონის დარღვევა გამორიცხულია. მოკლული დავით სარალიძის მამა სხდომას დაესწრება.

"კარავში ვიყავი, ბიჭები საპირფარეშოში გავიდნენ და იქიდან დააკავეს. რატომ დააკავეს, არ ვიცი. როგორც შსს-მ განაცხადა, ზვიად კუპრავამ პოლიციელებზე განახორციელა ზეწოლა, რაც ტყუილია. ყოფილი პოლიციელი ზეწოლას არასდროს განახორციელებს და მითუმეტეს, შეურაცხყოფას არ მიაყენებს. ეს კუპრავას დისკრედიტაციაა აქციიდან გამომდინარე. ვიტყვი იმასაც, რომ ზვიად კუპრავას ვიღაცასათან ჰქონდა შელაპარაკება. პატრულის ფორმაში იყო ვიღაც ჩაცმული, რომელსაც ზვიად კუპრავამ საბუთი მოსთხოვა, თუ რომელი სამსახურიდან იყო. მან არ წარუდგინა თავისი დამადასტურებელი მოწმობა. აქედან გამომდინარე, ის სუსის აგენტი იყო გადაცმული ფორმაში ან სხვა ვიღაც. ეს დაკავებამდე მოხდა", - თქვა სარალიძემ.

შსს-ს ცნობით, თბილისში, რუსთაველის გამზირზე პარლამენტის შენობის წინ წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ფაქტზე ადმინისტრაციულ სამართალდარღვევათა კოდექსის 166-ე და 173-ე მუხლებით დაკავებულია 4 პირი.

მანამდე ზაზა სარალიძემ სამართალდამცველებს ნახევარი საათი მისცა ვადა, რათა ისინი კარვებთან დააბრუნონ.

გარდა ამისა, ხორავას ქუჩაზე მოკლული ერთ-ერთი არასრულწლოვნის მამამ მოსახლეობას მოუწოდა, რომ 14:00 საათზე პარლამენტთან მივიდნენ.

პარლამენტის წინ გამართული აქციის მიზანი, როგორც თავად „ერთიანი ნაციონალური მოძრაობის“, „ეროვნულ-დემოკრატიული პარტიის“, „სახელმწიფო ხალხისათვის“, „ახალი საქართველოსა“ და „ლეიბორისტული პარტიის“ ლიდერები ამბობენ, ზაზა სარალიძისა და მალხაზ მაჩალიკაშვილისთვის სოლიდარობის გამოცხადებაა. 

ევროპული საქართველო დღეს დაგეგმილ აქციაში მონაწილეობას არ მიიღებს.

მანამდე ხორავას ქუჩაზე სისხლიანი გარჩევისას გარდაცვლილი დავით სარალიძის მამამ ხელისუფლებას საქმის გამოძიებისთვის ვადა 10 ივნისამდე მისცა. წინააღმდეგ შემთხვევაში, მან განაცხადა, რომ პარლამენტთან მასობრივ აქციებს განაახლებდა.

მანამდე შსს-მ ხორავას ქუჩაზე მომხდარი მკვლელობის საქმის ერთ-ერთი ფიგურანტის მამა, მირზა სუბელიანი მკვლელობის შეუტყობინებლობისთვის სისხლის სამართლის კოდექსის 376-ე მუხლით დააკავა. შსს-ს ინფორმაციით, სუბელიანი ბრალს აღიარებს.