გიორგი მარგველაშვილი საფრანგეთის პრეზიდენტს შეხვდა

ნატოს სამიტის ფარგლებში გამართულ ორმხრივ შეხვედრაზე საქართველოს და საფრანგეთის პრეზიდენტებმა გიორგი მარგველაშვილმა და ემანუელ მაკრონმა ბრიუსელში განიხილეს საქართველოს ურყევი არჩევანი-ევროპული და ევროატლანტიკური ინტეგრაციის შეუქცევადი პროცესი, ასევე საქართველოს წინაშე მდგარი უსაფრთხოების გამოწვევები.

პრეზიდენტის ადმინისტრაციის პრესსამსახურის ინფორმაციით, გიორგი მარგველაშვილმა და ემანუელ მაკრონმა ისაუბრეს საქართველო-საფრანგეთის ორმხრივი ურთიერთობების განვითარებაზე, საფრანგეთისა და პირადად პრეზიდენტ მაკრონის ჩართულობასა და აქტიურობაზე ძლიერი, ერთიანი ევროკავშირის მხარდასაჭერად, ასევე საქართველოს სახელმწიფოებრიობის განვითარებისათვის საკვანძო მნიშვნელობის საკითხებზე.

შეხვედრისას ასევე პოზიტიურად შეფასდა ის თანამშრომლობა, რომელიც საქართველოს აქვს სავიზო ლიბერალიზაციის მიღების შემდეგ. საქართველოს თანამშრომლობა საფრანგეთთან ნაყოფიერია და მომავალშიც ასე გაგრძელდება, რათა ის მონაპოვარი, რომელიც საქართველოს აქვს თავისუფალ სავიზო მიმოსვლასთან დაკავშირებით, იყოს მნიშნველოვანი წინ გადადგმული ნაბიჯი ევროპული ინტეგრაციის გზაზე.

ემანუელ მაკრონმა მადლობა გადაუხადა საქართველოს პრეზიდენტს საერთაშორისო მისიებში საქართველოს კონტრიბუციისათვის და აღნიშნა, რომ ძალაინ შთამბეჭდავია საქართველოს პროგრესი ნატო-ს გზაზე და საფრანგეთი რჩება საქართველოს მხარდამჭერად, როგორც ინტეგრაციის პროცესში, ასევე საქართველოს ტერიტორიული მთლიანობის მიმართულებით.

მხარეებმა ასევე რუსეთის აგრესიისა და ოკუპირებული ტერიტორიებზე შექმნილი ვითარებისა და რეგიონში უსაფრთხოების გარემოს შესახებ ისაუბრეს.

აღინიშნა, რომ რუსეთმა პატივი უნდა სცეს საერთაშორისო წესრიგს და რომ უსაფრტხოების არქიტექტურა ისე უნდა იყოს აწყობილი, რომ საქართველოს და უკრაინის სუვერენიტეტი და ტერიტორიული მთლიანობა აუცილებლად უნდა იყოს დაცული.

ითქვა, რომ საფრანგეთი ზრდის თავის ჩართულობას საქართველოს უსაფრთხოების არქიტექტურის გაძლიერებაში, ეს იქნება როგორც საჰაერო და თავდაცვის სისტემების მიმართულებით, ასევე საზღვაო ხომალდების მიმართულებით.

შეხვედრის ბოლოს გიორგი მარგველაშვილმა ემანუელ მაკრონი საქართველოში მოიწვია.

ნატოს სამიტის პირველ დღეს 29 მოკავშირე ქვეყნის ლიდერებმა ბრიუსელის სამიტის დეკლარაცია მიიღეს. ხოლო 12 ივლისს უკვე მიიღეს ნატო-საქართველოს კომისიის დეკლარაცია. 12 ივლისს დილით ბრიუსელში მიმდინარე ნატოს სამიტის ფარგლებში საქართველოს პრეზიდენტის გიორგი მარგველაშვილისა და ნატოს გენერალური მდივნის იენს სტოლტენბერგის ბრიფინგი გაიმართა.

ბრიუსელში ნატოს ორდღიანი სამიტია. სამიტში ალიანსის 29 წევრი და 20 პარტნიორი ქვეყანა მონაწილეობს.