მამუკა მდინარაძემ ხორავას ქუჩაზე მკვლელობის მოწმეს ტესტი ჩაუტარა

ხორავას ქუჩაზე მოკლული ორი მოზარდის საქმეზე შემნილი დროებითი საგამოძიებო კომისია ავტომობილის მძღოლ ნიკოლოზ იორდანაშვილს კითხავს, რომელიც შემთხვევის ადგილზე იყო. 

მამუკა იორდანაშვილმა თქვა, რომ მას ასტიგმატიზმი სჭირს (თვალის დაავადება), რის გამოც იმ მანძილიდან, სადაც იდგა დანა და დაჭრის მომენტი არ დაუნახავს. 

კომისიის წევრმა მამუკა მდინარაძემ მას უთხრა, რომ მიუხედავად იმისა, რომ თავადაც ასტიგმატიზმი აქვს, "ვიღაცამ დანა რომ ამოიღოს ამ ოთახში იმასაც გავარჩევ და დავინახავ ვინმეს რომ დაარტყას". მდინარაძემ მოწმეს მობილურ ტელეფონში ფოტო აჩვენა და ჰკითხა იცნო თუ არა ფოტოზე აღბეჭდილი ადამიანი, რაზეც მოწმემ დაუდასტურა და უთხრა "კი". ფოტოზე ზაზა სარალიძე იყო.

თქვენ იმდენივე მეტრში ამოიცანით ზაზა სარალაძე ტელეფონში, დაახლოებით რამდენ მეტრშიც მოხდა დადუნაშვილის მკვლელობა თქვენგან დაშორებით. თქვენ თქვით, რომ მხედველობაზე რაღაც პრობლემები გაქვთ. მე პირადად მაქვს ოთხნახევარი მინუსი ასტიგმატიზმი და ნამდვილად შემიძლია ამ და გაცილებით მეტ მანძილზე ამ ოთახში რაც ხდება გავარჩიო. ვიღაცამ დანა რომ ამოიღოს იმასაც გავარჩევ და დავინახავ ვინმეს რომ დაარტყას. თქვენზე სამით მეტი ასტიგმატიზმი მაქვს. თქვენ ახლა სამ მეტრში ტელეფონში ამოიცანით ზაზა სარალიძე. ხშირად არიან პასუხისმგებლობით სავსე მოქალაქეები, ვისი მეშვეობითაც იხსნება საქმეები. ამ ფონზე თქვენ მაინც არ გინდათ არაფრზე ისაუბროთ?“, - განაცხადა მამუკა მდინარაძემ. 

ამაზე მოწმემ უპასუხა, რომ მას ფარდულში მომხდარი არ დაუნახავს და ვერაფერს იტყვის. 

იორდანაშვილმა ასევე თქვა, რომ მოზარდების სიმრავლიდან გამომდინარე, მათ გაშველებას ვერ შესძლებდა და ამიტომაც არ ჩაერია ჩხუბში. აქვე მოწმემ თქვა, რომ „ადრე, ჩემს ბიჭობაშიც ჩხუბობდნენ, გაშველება მინდოდა და რომ იტყვიან კარგად მივიღე ცხვირ-პირში. მას მერე ვცდილობ არაფერში არ ჩავერიო. დღემდე მიტკაცუნებს ყბა. ალბათ 90-იან წლებში იყო. არ დამიმალია, უბრალოდ მეგონა, ახსნას მთხოვდით“, – განაცხადა მოწმემ.

ხორავას ქუჩაზე მკვლელობის საქმის შემსწავლელმა დროებითმა საპარლამენტო საგამოძიებო კომისიამ 17 ივლისს არასრულწლოვანი მოწმე გამოკითხა.

გამოკითხვა დახურულ კარს მიღმა, ფსიქოლოგების მონაწილეობით მიმდინარეობდა. როგორც კომისიის თავმჯდომარემ, სერგი კაპანაძემ განაცხადა, არასრულწლოვანი ხორავას ქუჩაზე გარჩევის უშუალო მონაწილეა.

12 ივლისს ცნობილი გახდა, რომ დროებითი საგამოძიებო საპარლამენტო კომისია ხორავას ქუჩის საქმის გამოძიების ფარგლებში გამოკითხვების დასრულებას ივლისის ბოლოს გეგმავს, დასკვნის გამოქვეყნებას კი, აგვისტოს ბოლოს ან სექტემბრის დასაწყისში.

დღეის მდგომარეობით, კომისიამ საქმეზე ორი რეკომენდაცია გასცა. 

საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. 

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.