ხორავას ქუჩის საქმეზე ახალ გარემოებად, სავარაუდოდ, მ,კ-ს წინააღმდეგ მიცემულ ჩვენებას განიხილავენ

შინაგან სქმეთა სამინისტრო პარლამენტის საგამოძიებო კომისიის წევრის, ელენე ხოშტარიას განცხადებას ეხმაურება, რომლის თანახმდაც კომისიამ ახალი გარემოება გამოარკვია, რაც მყისიერად ეცნობა  სამინისტროს.

„დღეს, პრაქტიკულად, უკვე დასრულდა არასრულწლოვნებისა და ძირითადი მოწმეების გამოკითხვა. გვინდა ვუთხრათ საზოგადოებას, რომ ამ დაკითხვების დროს გამოიკვეთა ძალიან მნიშვნელოვანი საკვანძო ახალი გარემოებები, რომლის შესახებაც ჩვენ მყისიერად ვაწვდით ინფორმაციას შსს-ს სწრაფი და ეფექტური რეაგირებისთვის. გამოძიების ინტერესებიდან გამომდინარე, თავს ვიკავებთ შინაარსის თქმისგან, თუ რაში მდგომარეობს ეს ახალი გარემოებები და ველოდებით შსს-ს. დღეს ვიკავებთ თავს ყველა დეტალის თქმისგან, რადგან ჩვენ ორიენტირებული ვართ შედეგებზე. მნიშვნელოვანია, შსს-მ სწრაფად მიიღოს ეს ინფორმაცია და შესაბამისად იმოქმედოს”, - განაცხადა ელენე ხოშტარიამ.

imedinews-ისთვის ცნობილი გახდა, რომ ახალი გარემოება, რომლის შესახებაც ხოშტარია საუბრობს, საქმის ერთ-ერთ მთავარ ფიგურანტს, მ.კ-ს შეეხება, რომლის წინააღმდეგაც მოწმემ ჩვენება მისცა.

მ.კ. ხორავას ქუჩის საქმის ფარგლებში დანაშაულის დაფარვის ბრალდებით დაპატიმრებული თენგიზ კალანდიას ვაჟია. მ.კ. საქმის ის ფიგურანტია, რომელმაც სასამართლოზე სამდღიანი დაკითხვის დროს იმდენჯერ შეცვალა ჩვენება, რამდენჯერაც სასამართლოში გამოცხადდა. ის ინციდენტში  ძმასთან ერთად მონაწილეობდა, რომელიც შემთხვევის დროს არასრულწლოვანი იყო. ამ დრომდე გამოძიება ლუკა კალანდიასაც დანაშაულის დაფარვას ედავება და ის გირაოთია გათავისუფლებული. რაც შეეხება მის უმცროს ძმას, ის არასრულწლოვნების გამო ასევე თავისუფალია და ოჯახის მეთვალყურეობის ქვეშ იმყოფება.

ხორავას ქუჩაზე მომხდარი მკვლელობის დროს ერთ-ერთი დაღუპულის მამამ, ზაზა სარალიძემ 3 ივლისს შსს-ს ეზოში ღამე სწორედ მ.კ-ს დაკავების მოთხოვნით გაათენა.

საგამოძიებო კომისიის 23 ივლისის სხდომაზე თბილისის ყოფილი პროკურორის და მისი მოადგილის გამოკითხვის დროსაც კითხვების დიდი ნაწილი ინციდენტში მ.კ-ს მონაწილეობას შეეხებოდა.

შინაგან საქმეთა სამინისტრო პარლამენტის საგამოძიებო კომისიის წევრების დღევანდელ განცხადებას გამოეხმაურა და აღნიშნა, რომ პირები, რომელთგან მოპოვებული ინფორმაციის საფუძველზეც საგამოძიებო კომისიამ დღეს განცხადება გაავრცელა, სამინისტროს გამოყოფილი საქმის ფარგლებში უკვე გამოკითხული ჰყავს. გამოკითხვის შედეგად მოპოვებულია გარკვეული ინფორმაცია, რომლის გადამოწმების და სხვა პირების პასუხისგებაში მიცემისთვის მიმდინარეობს ინტენსიური საგამოძიებო მოქმედებები.

„საგამოძიებო კომისიას არ აქვს სამინისტროს მიერ გამოყოფილი საქმის გამოძიების ფარგლებში მოპოვებული ყველა ინფორმაცია, ვინაიდან მტკიცებულებების შეკრება ხდება ყოველდღიურ რეჟიმში. აღსანიშნავია, რომ 2018 წლის 18 ივლისს შინაგან საქმეთა სამინისტრომ წერილობით მიმართა საგამოძიებო კომისიას და შესთავაზა გაუთქმელობის ხელწერილის საფუძველზე დამატებით მასალის, მათ შორის მათ მიერ დღეს მედია საშუალებებით გაჟღერებული ინფორმაციის გადაცემა, რაზეც კომისიიდან პასუხი სამინისტროს ამ დრომდე არ მიუღია“, - ნათქვამია უწყების განცხადებაში.

პარლამენტის დროებითი საგამოძიებო კომისია ოფიციალურ შემაჯამებელ დოკუმენტს მიმდინარე წლის სექტემბერში გამოაქვეყნებს. მუშაობის განმავლობაში კომისიამ ორი რეკომენდაცია უკვე გასცა, აქედან ერთ-ერთი მ.კ-ს წინააღმდეგ სისხლისსამართლებრივი დევნის დაწყება იყო. 

საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.