NDI-ის კვლევის შედეგებს პარლამენტში აფასებენ

ეროვნულ-დემოკრატიულმა ინსტიტუტმა (NDI) და CRRC– საქართველომ 2018 წლის ივნისში ჩატარებული საზოგადოებრივი აზრის კვლევის შედეგები გაასაჯაროეს.

პრეზენტაციაზე წარმოადგინეს ქვეყნის განვითარების კურსთან, რეფორმებთან, მიმდინარე მოვლენებთან, გარემოს დაცვასთან, საპრეზიდენტო არჩევებთან და პარტიების მხარდაჭერასთან დაკავშირებული საკითხები.

კვლევის შედეგებს პარლამენტში აფასებენ.

„ევროპული საქართველოს“ წარმომადგენლის, ირაკლი აბესაძის განცხადებით, NDI-ის კვლევით კიდევ ერთხელ დადასტურდა, რომ „ქართული ოცნების“ მმართველობის პირობებში მნიშვნელოვნად გაიზარდა სიღარიბე, არ მოგვარდა უმუშევრობის პრობლემა თუ სხვა საკითხები.

მმართველ გუნდში აცხადებენ, რომ NDI-ის კვლევებს არ ენდობიან.

თამარ ჩუგოშვილი ამბობს, რომ ეს კვლევა ვერ ასახავს რეალურ განწყობას საზოგადოებაში.

კვლევის თანახმად, საქართველოში ყველაზე მნიშვნელოვანი საკითხები სამუშაო ადგილები, სიღარიბე და ფასების ზრდაა.

 გამოკითხულთა 74%-ს არ აქვს გადაწყვეტილი, ვის აირჩევს საპრეზიდენტო არჩევნებში.

გამოკითხულთა 74% მარიხუანის ლეგალიზებას არ ემხრობა.

LGBT პირთა უფლებები მოსახლეობის მხოლოდ 23%-ისთვისაა მნიშვნელოვანი.

საქართველოში გამოკითხული მოსახლეობის 1%-მა არ იცის რა არის ინტერნეტი.

გამოკითხულთა 41%-ისთვის კვირიკაშვილის თანამდებობიდან გადადგომა მისაღებია.

კვლევა ჩატარდა 23 ივნისი-8 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) 2,409 პირისპირ ინტერვიუს წარმომადგენლობითი შერჩევის საფუძველზე. ცდომილება 1,9 პროცენტია.

NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო.