ამირან გამყრელიძე: 2000 ადამიანისთვის განკუთვნილ C ჰეპატიტის მედიკამენტებს ვადა გაუვიდა

C ჰეპატიტის სამკურნალო იმ მედიკამენტების რაოდენობა, რომელზეც სახელმწიფო უსაფრთხოების სამსახურის ანტიკორუფციულმა სააგენტომ გამოძიება დაიწყო, 2 000 ადამიანზეა გათვლილი. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ თქვა. ინფორმაციას სააგენტო "ინტერპრესნიუსი" ავრცელებს.

გამყრელიძის განმარტებით, პროგრამის ფარგლებში ყოველთვიურად დაახლოებით 3 500 ადამიანის მკურნალობა იყო გათვლილი, თუმცა მიმდინარე წლის აპრილის თვეში სერვისით 1 000-მა პირმა ისარგებლა, რის გამოც მედიკამენტების გარკვეული რაოდენობა ვერ გაიხარჯა და მათ ვარგისობის ვადა გაუვიდა.

როგორც ამირან გამყრელიძემ აღნიშნა, მედიკამენტების ვარგისობის ვადის გასვლას ბიუჯეტისთვის ზიანი არ მიუყენებია, რადგან საქართველოს ის დონაციით გადაეცემა.

"დღევანდელი რიცხვით დაახლოებით 50 000 ადამიანი არის ჩართული მკურნალობაში. ეს ნიშნავს, რომ პირველმა დაახლოებით 20 000-25 000-მა ადამიანმა იცოდა, რომ ეს დაავადება ჰქონდა და ელოდებოდა, რომ ამ ტიპის გარღვევა მზადდებოდა მსოფლიო მედიცინაში და ეს მედიკამენტი შეიძლებოდა საქართველოში გამოჩენილიყო, ამიტომ პირველ ეტაპზე საქართველოში მომართვიანობა იყო ძალიან მაღალი და 2015-2016 ჩვენ ყოველთვიურად 2 500-3000 ადამიანს ვმკურნალობდით. შემდგომ ეს თანდათან მცირდება, ამიტომ საქართველოს პროგრამა სხვა პროგრამებისგან იმით განსხვავდება, რომ ჩვენ პროაქტიულები ვართ ანუ კი არ ველოდებით, არამედ მივდივართ ადამიანებთან, ვეუბნებით, რომ დაავადება გამოიკვლიონ. გათვლებში ჩვენ გვქონდა ორიენტირებული ყოველთვიურად დაახლოებით 3 000 ადამიანის მკურნალობა და დღევანდელი რიცხვით მკურნალობაში ყოველთვიური ჩართვა 800-დან 1 200-ის ფარგლებში მერყეობს ანუ საშუალოდ 1000-ის ფარგლებში. ამიტომ მოხდა ის, რომ მედიკამენტების გარკვეულ ნაწილს გაუვიდა ვადა.

ვადაგასული მედიკამენტების რაოდენობა 2018 წელს არის 2 000 ადამიანზე გათვლილი მედიკამენტები. თანხობრივად ვერ ვიტყვით რამდენია, რადგან ჩვენთვის მას ნულოვანი ფასი აქვს და მედიკამენტების ვადის გასვლას ბიუჯეტისთვის ზიანი არ მიუყენებია, რადგან ბიუჯეტის არ არის ნაყიდი, ეს არის დონაცია“, - აღნიშნა ამირან გამყრელიძემ.

C ჰეპატიტის პროგრამის მიმდინარეობით სახელმწიფო უსაფრთხოების სამსახური დაინტერესდა. ანტიკორუფციულ სააგენტოში გამოძიება მედიკამენტების განაწილების პროცესში არსებულ შესაძლო დარღვევებთან დაკავშირებით მიმდინარეობს.

დღესვე დავით სერგეენკომ განაცხადა, რომ C ჰეპატიტის ელიმინაციის პროგრამაში ჩასართავად საჭირო კვლევების ღირებულება კიდევ უფრო მცირდება. სერგეენკოს თქმით, გენოტიპის ანალიზის დაფინანსებას ამირეიდან სახელმწიფო უზრუნველყოფს, რაც კვლევების ჯამურ ღირებულებას 140 ლარით შეამცირებს. პაციენტის მაქსიმალური ხარჯი 160 ლარს არ აღემატება.